अप्रिलको पहिलो सातापछि एसबीएबाट साना विजनेशले पाउने ऋण तीन गुणा बढाइने
प्रकाशित मिति : चैत्र ११, २०७७ बुधबार
अमेरिकामा कैयन साना विजनेशहरुले उपयुक्त ऋण नपाएर संघर्ष गरिरहेको बेलामा एसबीएको आपतकालिन ऋण कार्यक्रम अन्तरगत अब साना विजनेशहरुले ५ लाख डलरसम्म ऋण पाउने भएका छन् । एसबीएले साना विजनेशहरुका लागि ऋणको सिमा बढाएको हो ।
एसबीएका अधिकारी इसाबेला गुजमानले भनिन् – ‘महामारीले सोंचेभन्दा पनि लामो समयसम्म भएको छ । यो अवस्थामा हामी साना विजनेशलाई सहयोग गर्न चाहन्छौं । त्यसैले अब उनीहरुले प्राप्त गर्नसक्ने ऋण रकम विगतको तुलनामा तीनगुणासम्म बढाइने भएको छ ।’
ईआईडीएल ऋणमा उक्त परिवर्तन अप्रिल ६ देखि लागु हुने भएको छ । पहिले नै ऋण लिइसकेकाहरु र अहिले ऋण रकम बढाउनका लागि योग्य भएकाहरुले ऋण रकम बढाउनका लागि विकल्प प्राप्त गर्ने भएका छन् । अहिलेसम्म ऋण नपाएकाहरुलाई पनि तीनगुणाबढी सम्म ऋणका लागि अफर गरिने भएको छ ।
महामारी सुरु भएदेखि एसबीएले झण्डै ३८ लाख विजनेशहरुलाई सस्तो ब्याजमा २ सय बिलियन डलर ऋण दिएको छ । सुरुमा ९ लाख डलरसम्म ऋण दिइएपनि पछि डेढ लाख डलरमा सिमित गरिएको थियो । अब त्यसलाई बढाएर ५ लाख डलरसम्म बनाइने भएको छ ।
कोरोना भाइरस कार्यक्रम अन्तरगत एसबीएसँग अहिले २७० बिलियन डलर बाँकी रहेको जनाइएको छ । यो ऋण ३ दशमलव ७५ प्रतिशत ब्याजदरमा प्रदान गरिन्छ भने तीसबर्षभित्र तिर्न सकिन्छ ।