आक्रमण गर्नेलाई ७५ बर्षकी एसियन बृद्धाले लाठीले हिर्काएपछि आक्रमणकारी नै अस्पतालमा
प्रकाशित मिति : चैत्र ५, २०७७ बिहीबार
हजुरआमाको प्रतिरोधपछि आक्रमणकारीलाई हतकडी लगाएर स्ट्रेचरमा राखेर अस्पताल लगिदै
क्यालिफोर्नियामा ७५ बर्षकी एसियन बृद्ध महिलामाथि एकजना ३९ बर्षका पुरुषले आक्रमण गरेपछि महिलाले काठको टुक्राले हिर्काएर प्रतिरोध गरेकी छिन् । बृद्धा महिलाको लाठीले घाइते आक्रमणकारीलाई हतकडीसहित स्ट्रेचरमा राखेर अस्पताल लगिएको छ । भिडियोमा स्ट्रेचरमा रहेका आक्रमणकारीलाई हतकडी लगाइएको देखिएको छ ।
सान फ्रान्सिस्कोमा उक्त पुरुषले अचानक आक्रमण गरेपछि ती बृद्धा महिला जिया जेन जीले काठको टुक्राले हानेर प्रतिरोध गरेकी थिइन् । त्यसपछि रक्ताम्मे भएको आक्रमणकारीलाई अस्पताल भर्ना गरिएको थियो । आक्रमणपछि बृद्ध महिला निकै आत्तिएकी थिइन् ।
पछि उनलाई पनि अस्पताल लगिएको थियो । उनको अनुशार सुन्निएको छ भने एउटा आँखाले हेर्नमा समस्या भएको छ । ट्राफिक लाइटमा बाटो काट्न कुरिरहेको बेलामा उक्त व्यक्तिले अचानक आएर अनुहारमा हानेको ती बृद्धाले बताएकी छिन् । त्यसपछि उनले पनि काठको टुक्रा उठाएर आक्रमणकारीलाई हानेकी थिइन् ।
आक्रमण लगत्तैको भिडियोमा बृद्धाको एउटा हातमा काठको टुक्रा रहेको देखिन्छ भने अर्को हातमा रहेको आइस ब्यागले चोट लागेको अनुहारमा सेकेको देखिन्छ । ती महिलाले चाइनिज भाषामा ‘मलाई किन हानेको ?’ भन्दै रुदै बोलेको भिडियोमा देखिएको छ ।
Just came upon an attack on an elderly Asian woman on Market Street San Francisco. Effort I got more details pic.twitter.com/5o8r0eeHE2
— Dennis O’Donnell (@DennisKPIX) March 17, 2021
प्रहरीले सम्भावित घृणाको घटनाका रुपमा अनुसन्धान गरिरहेको जनाएको छ । बुधबार ८३ बर्षका एसियन पुरुषमाथि भएको आक्रमणको घटनामा समेत ती व्यक्ति संलग्न भएको आशंकामा प्रहरीले अनुसन्धान गरिरहेको छ ।