राहत चेक: ९० मिलियन अमेरिकनलाई पठाइयो १४ सयका दरले २४२ बिलियन डलर
प्रकाशित मिति : चैत्र ४, २०७७ बुधबार
अमेरिकी सरकारको आईआरएसले राहत चेक बापत ९० मिलियन अमेरिकनलाई १४ सय डलरका दरले २४२ बिलियन डलर पठाएको जनाएको छ । जुन चेक आज अधिकांशको खातामा प्राप्त भएको छ ।
तेश्रो चरणको राहत चेकका लागि योग्य हुने झण्डै आधा जनसंख्याले यो रकम प्राप्त गरिसकेको छ । सरकारले अधिकांशलाई बैंकमा डाइरेक्ट डिपोजिटमार्फत रकम पठाएको छ भने झण्डै १ लाख ५० हजारलाई हुलाकमार्फत चेक पठाएको छ ।
आगामी दिनमा बाँकीले राहत चेकको रकम प्राप्त गर्दै जानेछन् । कतिपयले यो रकम प्रिपेड कार्डका रुपमा समेत प्राप्त गर्ने भएका छन् । रकम प्राप्त गर्नका लागि कुनै पनि कदम चाल्नु नपर्ने आईआरएसले जनाएको छ ।
७५ हजार भन्दा कम बार्षिक आम्दानी भएकाले १४ सय डलर, १ लाख ५० हजार भन्दा कम आम्दानी भएका दम्पत्तिले २८ सय र हरेक डिपेन्डेन्टका लागि १४ सय डलरका दरले रकम प्राप्त गरेका छन् ।
राहत चेक २०१९ वा २०२० को आम्दानीको आधारमा वितरण गरिएको छ । सन् २०२० को ट्याक्स फाइल गरिसकेकाहरुका सन्दर्भमा २०२० कै आम्दानीका आधारमा र नगरेकाहरुको सन्दर्भमा २०१९ को आम्दानीका आधारमा चेक प्रदान गरिएको छ । उदाहरणका लागि दुईवटा बच्चा भएका दम्पत्तिले ५६ सय डलरको चेक पाउँछन् ।
यसरी गर्नुहोस् ट्रयाक
तपाईको एकाउन्टमा कुन दिन राहत चेक पठाइदैछ ? कुन विधिबाट पठाइदैछ ? कुन एकाउन्टमा पठाइदैछ ? त्यो हेर्नमिल्ने टुल आईआरएसले व्यवस्था गरेको छ ।
आफ्नो राहत चेक कुन बिधिबाट कहिले आउँछ थाहा पाउन यहाँ क्लीक गर्नुहोला ।
क्लीक गरिसकेपछि तपाईले फर्ममा सोसल सेक्युरिटी नम्बर, जन्ममिति, स्ट्रीटको ठेगाना र जीपकोड हाल्नुपर्छ । ठेगाना हाल्दा तपाईले स्ट्रीटको ठेगाना र अपार्टमेन्ट नम्बरमात्र हाल्नुपर्छ । सिटी र स्टेट उल्लेख गर्नुपर्दैन ।
तपाईको घरनम्बर र स्ट्रीट नम्बर हालेपछि अपार्टमेन्ट नम्बर उल्लेख गर्नुपर्छ । उदारहणका लागि तपाई ९७२० ५७ एभिन्युमा बस्नुहुन्छ भने त्यतीमात्र हालेर कमा पछि अपार्टमेन्ट नम्बर उल्लेख गर्नुपर्छ ।
पहिलो र दोश्रो चरणको चेकको स्टाटस हेर्न भने अनलाइनमा एकाउन्ट बनाउन जरुरी हुन्छ ।