मार्च १४ पछि थपिएको साप्ताहिक ३ सय पाउन कतिपयले अप्रिलभर कुर्नुपर्ने
प्रकाशित मिति : चैत्र ४, २०७७ बुधबार
अमेरिकामा काम गुमाएकाहरुका सन्दर्भमा बेरोजगारी विमा रकमका अतिरिक्त मार्च १४ पछि थपिएको साप्ताहिक ३ सय पाउन कतिपयले अप्रिलभर कुर्नुपर्ने भएको छ । अतिरिक्त रकम कैयनले अप्रिलको मध्य वा अन्त्यपछिमात्र पाउने डिपार्टमेन्ट अफ लेबरले बताएको छ ।
राष्ट्रपति जो बाइडेनले हस्ताक्षर गरेको १ दशमलव ९ ट्रिलियन डलरको बिलमा बेरोजगारी विमाका अतिरिक्त साप्ताहिक ३ सय डलर रकम सेप्टेम्बरको पहिलोसातासम्म पाउनेगरी बढाइएको हो । राज्यहरुलाई आफ्नो कम्प्युटर प्रणालीमा सुधार गर्न केही सातासम्म लाग्नसक्ने लेबर डिपार्टमेन्टको मेमोमा जनाइएको छ ।
कतिपय राज्यले कम्प्युटर प्रणालीमा छिटो परिवर्तन गरेको खण्डमा उक्त राज्यमा त्यो रकम छिटो नै प्राप्त हुनेछ । यसर्थ अतिरिक्त साप्ताहिक ३ सय कहिलेसम्म आइपुग्ने भन्ने कुरा राज्यमा निर्धारण हुनेछ । जहिलेसम्म आएपनि मार्च १४ कै मितिबाट हिसाब गरेर उक्त रकम प्रदान गरिनेछ ।
यसअगाडिको चरणका थपिएका बेरोजगारी सुविधा रकम पाउन पनि कतिपय राज्यमा हप्तौं र कतिपयमा महिनौं ढिलो भएको थियो । यद्यपी न्युयोर्क लगायतका राज्यहरुले भने उक्त रकम समयमै उपलब्ध गराएका थिए ।
गतसाता पारित राहत प्याकेजमा बेरोजगारी विमामा अतिरिक्त साप्ताहिक ३ सयको साथमा राहत चेकको पनि व्यवस्था गरिएकोमा राहत चेक प्राप्त हुन थालिसकेको छ । शुक्रबार पहिलो लटमा पठाइएको राहत चेक अधिकांशको खातामा आज मार्च १७ मा आइसकेको छ ।
राहत चेकको योग्यतामा परिवर्तन गरिएकाले ७५ हजारभन्दा कम आम्दानी हुनेहरुले राहत चेकको पूर्ण अंश प्राप्त गर्छन् । त्यस्तै दम्पत्तिको सन्दर्भमा १ लाख ५० हजारभन्दा कम आम्दानी हुनेहरुले पूरै राहत चेक पाउाछन् तर १ लाख ६० हजारभन्दा धेरै आम्दानी हुनेहरुले चेकको कुनै पनि अंश पाउँदैनन् ।
घरमूलीका सन्दर्भमा १ लाख १२ हजारभन्दा कम आम्दानी हुनेहरुले पूरै १४ सय पाउँछन् तर १ लाख २० हजारभन्दा बढी आम्दानी हुनेहरुले कुनै रकम पाउँदैनन् । थ्रेसहोल्ड भन्दा बढी आम्दानी हुनेहरुले पाउने राहत चेकको रकम घट्दै जाने हिसाबका लागि पनि नयाँ बिधिको प्रयोग गरिएको छ ।
राहत प्याकेजमा १ लाख ५० हजारभन्दा कम आम्दानी हुने परिवारको हकमा सुरुको १० हजार २ सय सम्मको सुविधा रकममा ट्याक्स नलाग्ने प्रावधान छ । तर बाइडेनले बिलमा हस्ताक्षर गर्नु अगाडि नै ट्याक्स फाइल गरेकाहरु यो सुविधा कसरी लिने भन्ने सन्दर्भमा अन्यौलमा परिरहेका छन् । आईआरएसले यो अन्यौल अन्त्य गर्नेगरी स्पष्ट पारिदिएको छ ।
पहिले ट्याक्स फाइल गरिसकेकाहरुलाई ट्याक्स नलाग्ने १० हजार २ सय डलरका लागि अहिले तुरुन्तै ट्याक्स परिमार्जन फाइल नगर्न आईआरएसले सुझाव दिएको छ । उक्त १० हजार २ सय डलरको समेत ट्याक्स तिरिसकेको अवस्थामा उक्त रकम फिर्ता पाउनका लागि आईआरएसले निकट भविश्यमा अतिरिक्त निर्देशिका जारी गर्ने स्पष्ट पारेको छ ।
आईआरएसले निर्देशिका जारी गरिसकेपछि उनीहरुले कदम चालेपछि पहिले तिरेको बेरोजगारी विमाको १० हजार २ सय डलरको ट्याक्स रकम फिर्ता पाउनेछन् ।
सन् २०२० मा बेरोजगारी विमा रकम लिएका तर ट्याक्स फाइल नगरेकाहरुलाई समेत ट्याक्स नलाग्ने १० हजार २ सय डलरको फाइदा लिनका लागि केही समय प्रतिक्षा गर्न आईआरएसले सुझाव दिएको छ । कागजीरुपमा फाइल गर्नेहरुका लागि छिट्टै वर्कसिट उपलब्ध गराउने र अनलाइनबाट फाइल गर्नेहरुका सन्दर्भमा सफ्टवेयर अपडेटका लागि सफ्टवेयर कम्पनीसँग काम गर्ने आईआरएसले जनाएको छ ।
प्रणालीमा अपडेट गरिसकेपछि ट्याक्स फाइल गर्ने व्यक्तिले कसरी बेरोजगारी विमाको ट्याक्स नलाग्ने रकम रिपोर्ट गर्ने भन्ने सन्दर्भमा विकल्पकहरु प्राप्त गर्नेछन् । नयाँ चरणको राहत चेक, बिस्तारित चाइल्ड ट्याक्स क्रेडिट, अगाडि नै प्राप्त गर्न सकिने चाइल्ड ट्याक्स क्रेडिटको रकम र अन्य ट्याक्सका प्रावधानहरु अपडेट गर्ने आईआरएसले जनाएको छ ।
मार्च ५ सम्म आईआरएसले ५६ मिलियन व्यक्तिका ट्याक्स रिटर्नहरु प्राप्त गरेको छ भने ४९ मिलियन व्यक्तिका फाइल प्रकृयामा लगिसकेको छ । गतबर्ष झण्डै ४० मिलियन व्यक्तिले अमेरिकामा बेरोजगारी विमा रकम प्राप्त गरेका थिए । औषतमा एकजना १४ हजार डलर सहायता प्राप्त गरेका थिए ।