नेपाली उबर चालकमाथि दुर्ब्यबहार गर्ने महिलालाई २० बर्ष जेल सजाय हुनसक्ने, तोकियो ७५ हजार धरौटी
प्रकाशित मिति : चैत्र २, २०७७ सोमबार
क्यालिफोर्नियाको सान फ्रान्सिस्कोमा नेपाली उबर चालक सुभाकर खड्कामाथि दुर्ब्यबहार गर्ने मुख्य महिला अर्ना किमाईबिरुद्धका अभियोगहरु प्रमाणित भएमा उनले २० बर्षसम्मको जेल सजाय भोग्नुपर्ने जनाइएको छ । उनीबिरुद्ध डकैती, आक्रमण तथा हातपात, षड्यन्त्र र स्वास्थ्य तथा सुरक्षा नियमको उल्लंघन लगायतका अभियोगहरु लगाइएको छ ।
यातायातमा काम गर्नेहरुबिरुद्ध हातपातका घटनामा एकबर्षसम्म जेल सजाय र १० हजार डलरसम्म जरिवानाको प्रावधान रहको छ । त्यस्तै पहिलो डिग्री डकैतीका सन्दर्भमा ९ बर्षसम्म जेलसजाय हुनसक्ने प्रावधान रहेको छ । अपराध गर्ने षड्यन्त्रका सन्दर्भमा एकबर्षसम्म जेल सजाय हुनसक्ने प्रावधान छ । सबै अभियोग प्रमाणित भएमा उनलाई २० बर्षसम्म जेल सजाय हुनसक्छ ।
२४ बर्षकी अर्ना किमाईले आइतबार राती प्रहरी समक्ष आत्मसमर्पण गरेकी छिन् । उनका लागि ७५ हजार डलर धरौटी तोकिएको जनाएको छ । अर्थात् उक्त रकम धरौटी राखेर उनले जेलबाहिर निस्केर पनि मुद्दा लड्न पाउनेछिन् । जेलको रेकर्ड अनुशार अहिलेसम्म अदालतमा सुनुवाईको मिति भने तोकिएको छैन ।
अर्ना किमाईबिरुद्ध एउटा छुट्टै घटनामा गाडी ठोक्काएर एकजना महिलालाई घाइते बनाएको आरोपमा समेत मुद्दा दायर भएको छ । सन् २०१९ को फेबु्रअरीमा किमाईले गाडी ठोक्काएर एकजना महिलालाई सख्त घाइते बनाएर भागेको मुद्दा दायर गरिएको हो ।
अर्ना किमाईले असुरक्षितरुपमा गाडी मोडेर अर्को गाडीलाई ठक्कर दिंदा उक्त गाडीमा रहेकी महिला सख्त घाइते भएकी थिइन् । अदालतमा दायर गरिएको मुद्दामा गाडीको क्षतिपूर्ति, उपचार खर्च र आम्दानी गुमेको क्षतिपूर्ति दावी गरिएको छ ।
ती महिलाले हाइवेमा १ सय २२ माइल प्रतिघण्टाको गतिमा गाडी चलाएको एउटा अर्को भिडियो समेत सार्वजनिक भएको छ । उक्त भिडियोमा गैरकानूनी रुपमा हाइवेमा बढी स्पीडमा गाडी कुदाएको देख्न सकिन्छ ।
ती महिला विगतमा पनि कम्तीमा तीनपटकसम्म पक्राउ परेको खुलासा भएको छ । उनी सन् २०१५ मा एकपटक र २०२० मा दुईपटक पक्राउ परेको रेकर्डमा देखिएको छ ।
उनी सन् २०१५ को जुलाई १४ मा अरुको सामान जबर्जस्ती लिएको अभियोगमा लस एन्जलसमा पक्राउ परेकी थिइन् । त्यस्तै सन् २०२० को फेबु्रअरी १२ मा अरेन्ज काउन्टीको प्रहरीले उनलाई चोरीको अभियोगमा पक्राउ गरेको थियो । त्यस्तै सन् २०२० कै जुलाई १६ मा उनी अरुको गाडी विना अनुमति लिएर हिडेको अभियोगमा पक्राउ परेकी थिइन् ।
दुर्ब्यबहार गर्ने अर्की महिला बिहिबार नै पक्राउ
नेपाली उबर चालक खड्कामाथि दुर्ब्यबहार गर्ने अर्की महिला २४ बर्षकी मलेसिया किङलाई प्रहरीले बिहिबार नै पक्राउ गरेको थियो । ती महिलामाथि पनि आक्रमण गरेको, अरुको सामान जबर्जस्ती खोसेको र स्वास्थ्य तथा सुरक्षा नियम उल्लंघन गरेको अभियोग लगाइएको छ ।
ती महिलाले पनि विगतमा नक्कली परिचयपत्र प्रयोग गरेर बैंकमा रकम ट्रान्सफर गर्ने लगायतका काम गरेको खुलासा भएको छ । खड्काले तीनजना महिला यात्रुलाई पिकअप गरेका भएतापनि बीचमा बस्ने अर्की महिलालाबिरुद्ध भने कुनै अभियोग लगाइएको छैन । ती महिला भिडियोमा दुर्ब्यबहारमा संलग्न नभएको र मोबाइल चलाएर बसिरहेको देख्न सकिन्छ । प्रहरीले अनुसन्धान गरिरहेको जनाएको छ ।
भिडियोमा खोक्ने, फोन खोस्ने, मास्क च्यात्ने र अपशब्द बोल्ने मुख्य व्यक्ति किमाई हुन् भने अर्को छेउमा रहेकी रातो पोशाक लगाउने मलेसिया किङ हुन् । मलेसिया किङले पनि खड्कामाथि खोक्ने र आफूलाई कोरोना संक्रमण भएको भन्दै दुर्ब्यबहार गरेको भिडियोमा देखिएको छ ।
उबरले नेपाली चालकमाथि भएको यो आक्रमण भयावह भएको बताउँदै दुर्ब्यबहार गर्ने यात्रुको एकाउन्ट खारेज गरिदिएको थियो । त्यसपछि युवतीले अब लिफ्ट चढ्ने घोषणा गरेकी थिइन् । तर लगत्तै लिफ्टले पनि ती युवतीमाथि प्रतिबन्ध लगाएको थियो ।
ती युवतीलाई मास्क लगाउन आग्रह गर्दा उनी र उनको समुहले गत साता नेपाली उबर चालक खड्कामाथि खोक्नुका साथै मास्क च्यात्ने, फोन खोस्ने, पिरो स्प्रे छर्कने तथा अपशब्द बोल्ने लगायतका दुब्र्यबहार गरेका थिए ।
खड्काले आफूमाथि दक्षिण एसियाली आप्रवासी भएका कारण उनीहरुले निशाना बनाएको र विभेदकारी गाली गलौज समेत गरेको बताएका छन् । गाडीमा चढेकी ती महिलाले मास्क लगाउन अस्वीकार गरेपछि आफूले गाडी रोकेको तथा मास्क किन्नका लागि ग्यास स्टेशनति गाडी लैजाने क्रममा ती महिलाले दुब्यबहार सुरु गरेको खड्काले बताएका छन् ।