नेपाली समुदायसँग नजिक न्युयोर्क सिटी मेयर उम्मेदबारलाई १० मिलियन डलर फण्डरेज
प्रकाशित मिति : चैत्र १, २०७७ आईतबार
नेपाली टोपीमा एरिक आडम्स
न्युयोर्कमा रहेको नेपाली समुदायसँग नजिक रहेका न्युयोर्क सिटी मेयरका उम्मेदबार एरिक आडम्सले झण्डै १० मिलियन डलर फण्डरेज गरेका छन् । न्युयोर्क सिटी मेयरको चुनावका लागि डेमोक्रेटिक प्राइमरीका उम्मेदबार आडम्सको अभियानका लागि चुनावका लागि अधिकतम खर्च गर्न पाइने रकमभन्दा पनि धेरै फण्डरेज भएको छ ।
म्याच फण्ड प्राप्त भएपछि एरिक आडम्सको चुनावी अभियानका लागि खर्च गर्न बाँकी रहेको ८ मिलियन डलर हातमा हुनेछ । विगत २ महिनाको अवधिमामात्र ३ लाख ३० हजार फण्डरेज भएको उनको चुनावी अभियानमा ल्याटिनो र जातीय आउरिच सल्लाहकार होजे बेयोनाले जानकारी दिएका छन् ।
एरिक आडम्स न्युयोर्कसिटीभित्रबाट संकलित फण्डमा ८ गुणासम्म म्याचफण्ड प्राप्त गर्न योग्य रहेका छन् । बु्रकलिन बोरो प्रेसिडेण्ट समेत रहेका आडम्स न्युयोर्कमा नेपाली समुदायसँग नजिक मानिन्छन् । नेपालीहरुका विभिन्न कार्यक्रमहरुमा सहभागी हुनेदेखि कोरोना महामारीमा नेपाली समुदायलाई उनको कार्यालयका तर्फबाट विशेष सहयोग उपलब्ध गराइएको थियो ।
न्युयोर्क सिटीका हरेक कुनाबाट आफूलाई सहयोग प्राप्त भएकोमा आफू निकै उत्साहित भएको उनले बताएका छन् । एरिक आडम्सले विभिन्न चर्चित राजनीतिज्ञहरुबाट समर्थन समेत प्राप्त गरिसकेका छन् ।