यौन उत्पीडनका आरोपहरुपछि न्युयोर्क गर्भनर कुमोमाथि राजिनामाको दवाव र महाभियोग अनुसन्धान
प्रकाशित मिति : फाल्गुन २८, २०७७ शुक्रबार
श्रृंखलाबद्ध यौन उत्पीडनका आरोपहरुपछि न्युयोर्क गर्भनर एन्ड्रयु कुमोमाथि राजिनामाको दवाव परेको छ । प्रतिनिधिसभामा प्रतिनिधित्व गर्ने न्युयोर्कका अधिकांश डेमोक्रेटिक सांसदहरुले कुमोलाई राजिनामा दिन भनेका छन् । १३ जना डेमोक्रेटिक सांसदहरुले कुमोले राजिनामा दिनैपर्ने बताएका हुन् ।
कुमोमाथि लागेका अभियोगहरुका कारण न्युयोर्कका जनतालाई प्रभावकारी रुपमा सेवागर्ने उनको क्षमतामा बाधा उत्पन्न भएको सांसदहरुको ठहर छ । न्युयोर्क राज्य संसदको तल्लो सदनका स्पीकरले कुमोबिरुद्धको महाभियोग अनुसन्धान अगाडि बढाउन स्वीकृति दिए लगत्तै संघीय संसदमा प्रतिनिधित्व गर्ने डेमोक्रेटिक सांसदहरुले राजिनामा मागेका हुन् ।
कुमोलाई राजिनामा दिन भन्ने सांसदहरुमा अलेक्जिेन्ड्रिया ओकासियो कोर्टेज , एभेट क्लार्क, ग्रेस मेङ, एन्टोनियो डेलगाडो लगायत रहेका छन् । कुमो प्रशासनमाथि न्युयोर्कका दीर्घकालिन हेरचाह केन्द्रहरुमा कोरोनाबाट मृत्यु हुने ५० प्रतिशतको मृत्युको रिपोर्ट नगरेको विवरण राज्यको एटोर्नी जनरलको अफिसले प्रकाशित गरेको थियो ।
गतसाता कुमोले आफ्नो व्यवहारका कारण महिलाहरुमा असहज अनुभव भएको भन्दै क्षमा मागेका थिए । तर उनले कसैलाई पनि अनुचित तरिकाले छोएको आरोप अस्वीकार गरेका थिए । साथै उनले राजिनामाको माग पनि अस्वीकार गरेका थिए ।
बिहिबार न्युयोर्कको राज्यको संसदका दुबै सदनका ५० भन्दा धेरै सांसदहरुले एउटा पत्रमार्फत पनि कुमोले राजिनामा दिने समय आएको बताएका थिए । वासिंटन डिसीमा संघीय सिनेटमा प्रतिनिधित्व गर्ने न्युयोर्कका सिनेटर चक सुमरले कुमोबिरुद्धका अभियोगहरु निकै दुखदायी रहेको बताएका छन् । साथै ती अभियोगहरु विस्तृत रुपमा अनुसन्धान गर्नुपर्ने बताएका थिए । तर कुमोले राजिनामा दिनुपर्ने कुरा भने उनले उठाएनन् ।
त्यस्तै न्युयोर्कबाटै संघीय सिनेटमा प्रतिनिधित्व गर्ने सिनेटर क्रिस्चेन जिलिब्राण्डले पनि राजिनामाको कुरा उठाएकी छैनन् । तर उनले पनि कुमोबिरुद्धका अभियोगहरुको अनुसन्धान हुनुपर्ने बताएकी छिन् ।