राहत चेक समेटिएको बिल प्रतिनिधिसभाबाट पनि पारित, अब राष्ट्रपतिले हस्ताक्षर गर्ने
प्रकाशित मिति : फाल्गुन २६, २०७७ बुधबार
अमेरिकी राष्ट्रपति जो बाइडेन समर्थित १ दशमलव ९ ट्रिलियन डलरको राहत प्याकेज अमेरिकी संसदको तल्लो सदन प्रतिनिधिसभाबाट पनि पारित भएको छ । बिलका पक्षमा २२० र विपक्षमा २११ मत खसेको छ । एकजना डेमोक्रेटिक सांसदले बिलको विपक्षमा मतदान गरे भने एकजना रिपब्लिकन सांसदले मतदान गरेनन् । शनिबार सिनेटबाट पारित भएको प्याकेज आज प्रतिनिधिसभाबाट पारित भएपछि अब यसमा राष्ट्रपति बाइडेनले हस्ताक्षर गर्नमात्र बाँकी रहेको छ ।
यो प्याकेज सिनेटबाट संसोधनसहित पारित भएकाले पुन प्रतिनिधिसभाबाट पारित गर्नुपर्ने अवस्था आएको हो । अब यो प्याकेज बाइडेन प्रशासनले प्रतिज्ञा गरेको अनुशारको पहिलो विधायिका जीत भएको छ । बजेट प्रकृयाबाट पारित गरिएकाले प्याकेज पारित गर्नका लागि रिपब्लिकन सांसदको सहयोग आवश्यक परेन ।
प्याकेजमा बाइडेनले यसैसाता हस्ताक्षर गर्ने अपेक्षा गरिएको छ । त्यसपछि अधिकांशले मार्चभित्रै तेश्रो चरणको राहत चेक प्राप्त गर्नेछन् ।
राहत प्याकेजमा १४ सय डलरको राहत चेक र बेरोजगारी विमाका अतिरिक्त साप्ताहिक ३ सय सय डलर सेप्टेम्बर ६ सम्म प्रदान गर्ने उल्लेख छ । त्यस्तै १ लाख ५० हजारभन्दा कम आम्दानी हुने परिवारको हकमा सुरुको १० हजार २ सय सम्मको सुविधा रकममा ट्याक्स नलाग्ने प्रावधान पारित भएको छ ।
राहत चेकको योग्यतामा परिवर्तन गरिएकाले ७५ हजारभन्दा कम आम्दानी हुनेहरुले राहत चेकको पूर्ण अंश प्राप्त गर्नेछन् । तर ८० हजारभन्दा बढी आम्दानी हुनेहरुले पनि राहत चेकको कुनै पनि अंश प्राप्त नगर्नेगरी सहमति कायम भएको छ । त्यस्तै दम्पत्तिको सन्दर्भमा १ लाख ५० हजारभन्दा कम आम्दानी हुनेहरुले पूरै राहत चेक पाउनेछन् तर १ लाख ६० हजारभन्दा धेरै आम्दानी हुनेहरुले चेकको कुनै पनि अंश पाउनेछैनन् ।
घरमूलीका सन्दर्भमा १ लाख १२ हजारभन्दा कम आम्दानी हुनेहरुले पूरै १४ सय पाउनेछन् तर १ लाख २० हजारभन्दा बढी आम्दानी हुनेहरुले कुनै रकम पाउनेछैनन् । थ्रेसहोल्ड भन्दा बढी आम्दानी हुनेहरुले पाउने राहत चेकको रकम घट्दै जाने हिसाबका लागि पनि नयाँ बिधिको प्रयोग गरिने भएको छ ।