९ घण्टा गतिरोध बनाउने डेमोक्रेटिक सिनेटरसँग राहत प्याकेजमा २ परिवर्तनसहित सहमति
प्रकाशित मिति : फाल्गुन २१, २०७७ शुक्रबार
एउटै रुढीवादी डेमोक्रेटिक सिनेटरका कारण आज अमेरिकी सिनेटमा राहत प्याकेज अगाडि बढाउनमा ९ घण्टा गतिरोध उत्पन्न भयो । वेष्ट भर्जिनियाका डेमोक्रेटिक सिनेटर जो मन्चिन थर्डका कारण शुक्रबार दिनभर सिनेटमा गतिरोध उत्पन्न हुन पुगेको हो ।
राहत प्याकेजमा डेमोक्रेटिक सिनेटर मन्चिनले असहमति जनाएपछि पचास पचासमा विभाजित सिनेटबाट राहत प्याकेज अगाडि बढ्न सकेको थिएन । बजेट प्रकृयाबाट ५० जना सिनेटरहरुको भोट र उपराष्ट्रपतिको टाइब्र्रेक भोटबाट राहत प्याकेज पारित हुन सक्ने भएतापनि एउटै सिनेटरले च्याँखे थापेपछि प्रकृया अगाडि बढ्न सकेको थिएन ।
शुक्रबार राती सिनेटर मन्चिन सहमतिमा आएका छन् । अमेरिकी राष्ट्रपति जो बाइडेन समर्थित १ दशमलव ९ ट्रिलियनको राहत प्याकेजमा अब बेरोजगारी विमाका अतिरिक्त प्राप्त गर्ने रकम ३ सय बनाउने् र सेप्टेम्बर ६ सम्ममात्र दिने सहमति भएको छ ।
यसअगाडि नै हाउसबाट पारित बिलमा बेरोजगारी विमाका अतिरिक्त प्राप्त गर्ने साप्ताहिक रकम ४ सय रहेकोमा त्यसलाई घटाएर ३ सय बनाइएको थियो । तर बिलको सुरुको भर्सनमा अगस्तको अन्तिमसम्ममात्र अतिरिक्त रकम दिने उल्लेख भएकोमा त्यसलाई एकमहिना बढाएर सेप्टेम्बरभर रकम दिने बनाइएको थियो । तर मन्चिनसँगको् सहमति अनुरुप सेप्टेम्बर ६ सम्ममात्र दिइने भएको छ ।
त्यस्तै १ लाख ५० हजारभन्दा कम आम्दानी हुने परिवारको हकमा सुरुको १० हजार २ सय सम्मको सुविधा रकममा ट्याक्स नलाग्ने समेत प्रावधानमा सहमति कायम भएको छ । हाउसबाट पारित बिलमा ट्याक्सको प्रावधान समावेश नभएपनि यसलाई सिनेटमा संसोधन गरिएको थियो । मन्चिनसँगको सहमतिमा १ लाख ५० हजारको थ्रेसहोल्ड कायम गरिएको छ ।
हाउसबाट पारित बिल सिनेटमा संसोधन गरिएकाले उक्त बिल राष्ट्रपति बाइडेनको टेबुलसम्म पुग्नु अगाडि पुन प्रतिनिधिसभाबाट पारित गराउनुपर्ने भएको छ । प्रतिनिधिसभाबाट आगामी साताको सुरुतिर पारित हुने अपेक्षा गरिएको छ । स्पीकर न्यान्सी पेलोसीले प्रतिनिधिसभाबाट बिल पारित गर्ने ग्यारेन्टी गरेकी छिन् । बिल मार्च १४ सम्म राष्ट्रपति बाइडेनले हस्ताक्षर गर्ने अपेक्षा गरिएको छ ।
१४ सय डलरको राहत चेक समेटिएको राहत प्याकेजमा सिनेटमा बिहिबारदेखि नै बहस सुरु भएको हो । बहस सुरु गर्नका लागि बिहिबार भएको मतदानमा बहस सुरु गर्ने पक्षमा ५१ र विपक्षमा ५० मत खसेको थियो ।
सबै रिपब्लिकन सिनेटरहरुले विपक्षमा र सबै डेमोक्रेटिक सिनेटरले पक्षमा मतदान गरेका थिए । उपराष्ट्रपति कमला ह्यारिसले टाइब्रेक गरेपछि ५१ मत प्राप्त भएकाले प्याकेजबारे बहस सुरु भएको हो । प्रतिनिधिसभाबाट पारित प्याकेजमा राहत चेकका योग्यताबारे केही संसोधन गरेलगत्तै सिनेटमा बहस सुरु भएको हो ।
यसै सप्ताहन्तमा सिनेटबाट प्याकेज पारित हुने अपेक्षा गरिएको छ । रिपब्लिकन सिनेटर रोन जोन्सनले पूरै ६२८ पेजको बिल सिनेटको फ्लोरमा पढ्न बाध्य पारेपछि प्रकृया केही ढिलो भएको थियो । अब सिनेटमा बहस र सुधारमा मतदानपछिमात्र बिल पारित हुने अपेक्षा गरिएको छ ।
बिल पारित गर्नका लागि रिपब्लिकन सिनेटरहरुको समर्थन आवश्यक छैन । किनभने डेमोक्र्याट्सहरुले ६० फिलिबस्टर नचाहिने र सामान्य बहुमतबाटमात्र बिल पारित गर्नसकिने गरी बजेट प्रकृयामार्फत बिललाई अगाडि बढाएका छन् ।
राहत चेकको योग्यतामा गरिएको परिवर्तन अनुशार ७५ हजारभन्दा कम आम्दानी हुनेहरुले राहत चेकको पूर्ण अंश प्राप्त गर्नेछन् । तर ८० हजारभन्दा बढी आम्दानी हुनेहरुले पनि राहत चेकको कुनै पनि अंश प्राप्त नगर्नेगरी सहमति कायम भएको छ । त्यस्तै दम्पत्तिको सन्दर्भमा १ लाख ५० हजारभन्दा कम आम्दानी हुनेहरुले पूरै राहत चेक पाउनेछन् तर १ लाख ६० हजारभन्दा धेरै आम्दानी हुनेहरुले चेकको कुनै पनि अंश पाउनेछैनन् ।
घरमूलीका सन्दर्भमा १ लाख १२ हजारभन्दा कम आम्दानी हुनेहरुले पूरै १४ सय पाउनेछन् तर १ लाख २० हजारभन्दा बढी आम्दानी हुनेहरुले कुनै रकम पाउनेछैनन् । थ्रेसहोल्ड भन्दा बढी आम्दानी हुनेहरुले पाउने राहत चेकको रकम घट्दै जाने हिसाबका लागि पनि नयाँ बिधिको प्रयोग गरिने भएको छ ।