ज्याक्सनहाइटमा नेपालीका विजनेशहरु भएको क्षेत्रमा आगलागी, आधादर्जन अग्नीनियन्त्रक घाइते
प्रकाशित मिति : फाल्गुन २१, २०७७ शुक्रबार
न्युयोर्कको ज्याक्सनहाइट ७४ स्ट्रीटमा नेपालीका झण्डै आधादर्जन विजनेशहरु भएको क्षेत्रमा भीषण आगलागी भएको छ । गएराती ११ बजेपछि भएको आगलागी नियन्त्रणका क्रममा आधादर्जन बढी अग्नीनियन्त्रक घाइते भएका छन् ।
डाइभइर्सिटी प्लाजासँगै जोडिएका ७४ स्ट्रीटको ३७५४ भवनमा आगलागी सुरु भएको हो । बेसमेन्टबाट आगलागी सुरु भएको र त्यसपछि माथिल्लो तलामा रहेका कैयन विजनेशहरुमा आगलागी फैलिएको जनाइएको छ । आगलागीको समयमा स्टोरहरु भने बन्द रहेकाले अन्य मानवीय क्षति भने हुन नपाएको जनाइएको छ ।
विहान ४ बजेमात्र आगलागी नियन्त्रणमा आएपनि त्यस क्षेत्रमा रहेका अन्य विजनेशहरु पनि आज खोल्न दिइएको छैन । नजिकै रहेको आफ्नो विजनेश पनि आज खोल्न नदिइएको र भवनमा प्रवेश गर्न रोक लगाइएको आगलागी भएको भवनको अगाडि पासाङ स्ट्राइकिङ संचालन गरिरहेको हेयरस्टाइलिष्ट पासाङ शेर्पाले जानकारी दिए ।
आगलागी भएको भवनसँग जोडिएका नेपालीका मनी ट्रान्सफर, फोन पसल र रेष्टुरेण्ट समेत प्रभावित भएको जनाइएको छ । आगलागी प्रिन्स कबाब एण्ड चाइनिज रेष्टुरेण्टको बेसमेन्टबाट सुरु भएको जनाइएको छ । त्यसपछि आगो अगाडिपट्टी रहेका कम्तीमा ५ वटा विजनेशहरुमा फैलिएको जनाइएको छ ।
आगलागी भएको रेष्टुरेण्टको छेउमा न्यु मेनका सेलुन, टि मोबाइलको स्टोर, रोज सेलुन, अर्मान ब्राइडल, क्यारेट २२ लगायतको गहना पसल रहेका छन् । गहना पसलसँग नेपालीका विजनेशहरु जोडिएका छन् ।
