राहत प्याकेजः काम गुमाएकाले पाउने अतिरिक्त साप्ताहिक रकम घटाइयो, १० हजार २ सयसम्म ट्याक्स नलाग्ने
प्रकाशित मिति : फाल्गुन २१, २०७७ शुक्रबार
अमेरिकी राष्ट्रपति जो बाइडेन समर्थित १ दशमलव ९ ट्रिलियनको राहत प्याकेजमा सिनेटमा अन्तिम पुनरावलोकन भएको छ । जस अनुशार बेरोजगारी विमाका अतिरिक्त प्राप्त गर्ने साप्ताहिक रकम घटाइने भएको छ ।
हाउसबाट पारित बिलमा बेरोजगारी विमाका अतिरिक्त प्राप्त गर्ने साप्ताहिक रकम ४ सय रहेकोमा त्यसलाई घटाएर ३ सय बनाइएको छ । तर बिलको सुरुको भर्सनमा अगस्तको अन्तिमसम्ममात्र अतिरिक्त रकम दिने उल्लेख भएकोमा त्यसलाई एकमहिना बढाएर सेप्टेम्बरभर रकम दिने बनाइएको छ ।
यो रकम काम गुमाएर नियमित बेरोजगारी बिमा वा महामारी बेरोजगारी सहायता दुबै प्राप्त गरिरहेकाहरुले पाउनेछन् । त्यस्तै सुरुको १० हजार २ सय सम्मको सुविधा रकममा ट्याक्स नलाग्ने समेत प्रावधान समावेश गरिएको छ । हाउसबाट पारित बिलमा ट्याक्सको प्रावधान समावेश नभएपनि यसलाई सिनेटमा संसोधन गरिएको हो ।
बिलबारे अन्तिम मतदान हुनु अगाडि श्रृंखलाबद्ध संसोधन प्रस्तावहरुमा शुक्रबार दिउसोसम्म मतदान भएको थियो । हाउसबाट पारित बिल सिनेटमा संसोधन गरिएकाले उक्त बिल राष्ट्रपति बाइडेनको टेबुलसम्म पुग्दा संसदमा थप कामहरु गर्नुपर्ने भएको छ । बिल मार्च १४ सम्म राष्ट्रपति बाइडेनले हस्ताक्षर गर्ने अपेक्षा गरिएको छ ।
१४ सय डलरको राहत चेक समेटिएको राहत प्याकेजमा सिनेटमा बिहिबारदेखि नै बहस सुरु भएको हो । बहस सुरु गर्नका लागि बिहिबार भएको मतदानमा बहस सुरु गर्ने पक्षमा ५१ र विपक्षमा ५० मत खसेको थियो ।
सबै रिपब्लिकन सिनेटरहरुले विपक्षमा र सबै डेमोक्रेटिक सिनेटरले पक्षमा मतदान गरेका थिए । उपराष्ट्रपति कमला ह्यारिसले टाइब्रेक गरेपछि ५१ मत प्राप्त भएकाले प्याकेजबारे बहस सुरु भएको हो । प्रतिनिधिसभाबाट पारित प्याकेजमा राहत चेकका योग्यताबारे केही संसोधन गरेलगत्तै सिनेटमा बहस सुरु भएको हो ।
यसै सप्ताहन्तमा सिनेटबाट प्याकेज पारित हुने अपेक्षा गरिएको छ । रिपब्लिकन सिनेटर रोन जोन्सनले पूरै ६२८ पेजको बिल सिनेटको फ्लोरमा पढ्न बाध्य पारेपछि प्रकृया केही ढिलो भएको थियो । अब सिनेटमा बहस र सुधारमा मतदानपछिमात्र बिल पारित हुने अपेक्षा गरिएको छ ।
बिल पारित गर्नका लागि रिपब्लिकन सिनेटरहरुको समर्थन आवश्यक छैन । किनभने डेमोक्र्याट्सहरुले ६० फिलिबस्टर नचाहिने र सामान्य बहुमतबाटमात्र बिल पारित गर्नसकिने गरी बजेट प्रकृयामार्फत बिललाई अगाडि बढाएका छन् ।
राहत चेकको योग्यतामा गरिएको परिवर्तन अनुशार ७५ हजारभन्दा कम आम्दानी हुनेहरुले राहत चेकको पूर्ण अंश प्राप्त गर्नेछन् । तर ८० हजारभन्दा बढी आम्दानी हुनेहरुले पनि राहत चेकको कुनै पनि अंश प्राप्त नगर्नेगरी सहमति कायम भएको छ । त्यस्तै दम्पत्तिको सन्दर्भमा १ लाख ५० हजारभन्दा कम आम्दानी हुनेहरुले पूरै राहत चेक पाउनेछन् तर १ लाख ६० हजारभन्दा धेरै आम्दानी हुनेहरुले चेकको कुनै पनि अंश पाउनेछैनन् ।
घरमूलीका सन्दर्भमा १ लाख १२ हजारभन्दा कम आम्दानी हुनेहरुले पूरै १४ सय पाउनेछन् तर १ लाख २० हजारभन्दा बढी आम्दानी हुनेहरुले कुनै रकम पाउनेछैनन् । थ्रेसहोल्ड भन्दा बढी आम्दानी हुनेहरुले पाउने राहत चेकको रकम घट्दै जाने हिसाबका लागि पनि नयाँ बिधिको प्रयोग गरिने भएको छ ।