फ्रान्सका पूर्व राष्ट्रपति निकोलस सार्कोजी भ्रष्टाचारमा दोषी, तीनबर्षको जेल सजाय
प्रकाशित मिति : फाल्गुन १७, २०७७ सोमबार
फ्रान्सका पूर्व राष्ट्रपति निकोलस सार्कोजी भ्रष्टाचारमा दोषी ठहर भएका छन् । उनलाई त्यहाँको अदालतले सोमबार भ्रष्टाचार र गैर कानुनी धन्धा गरेको अभियोग पुष्टी गर्दै तीनबर्षको जेल सजाय सुनाएको हो ।
सन् २००७ देखि सन् २०१२ सम्म फ्रान्सका राष्ट्रपति भएका सन् २०१४ मा सार्कोजीले उनीबिरुद्ध चलिरहेको एउटा आर्थिक हिनामिनाबारेको अनुसन्धानका क्रममा न्यायाधिसबाट सुचनाहरु गैरकानूनी रुपमा प्राप्त गर्न प्रयास गरेकोमा दोषी ठहरिएका छन् ।
सार्कोजीलाई जेल सजाय सुनाइएको भएतापनि उनी जेलभित्रै भने बस्नु नपर्ने भएको छ । उनी घरमै बसेर जीपीएससहितको विद्युतीय ब्रासलेट लगाएर यो सजाय पूरा गर्न सक्ने भएका छन् । फ्रान्सको आधुनिक इतिहासमा जेल सजाय पाउने ६६ बर्षका सार्कोजी पहिलो व्यक्ति हुन् ।
पेरिसका अभियोजनकर्ताहरुले सार्कोजीलाई २ बर्ष जेल सजायको माग गरेका थिए । लामो अनुसन्धानपछि गतबर्षको अन्तिममा सार्कोजीबिरुद्ध अदालती परीक्षण सुरु भएको थियो । सोमबार न्यायाधिसले भरिभराउ अदालतको कक्षमा सार्कोजीबिरुद्धको सजाय सुनाएका हुन् ।
सार्कोजीबिरुद्धका अन्य अभियोगहरु पनि रहेका छन् । सन् २०१२ को असफल चुनावी अभियानका क्रममा आर्थिक हिनामिना गरेको अभियोगमा उनलाई अर्कोपटक पनि अदालतमा उभ्याइने भएको छ । त्यस्तै अर्को मुद्दामा उनले लिबियाबाट गैरकानूनी रुपमा चुनावका लागि रकम प्राप्त गरेको अभियोग छ ।