ट्रम्पले नयाँ पार्टी नखोल्ने, २०२४ मा उम्मेदबारी दिने संकेत
प्रकाशित मिति : फाल्गुन १६, २०७७ आईतबार
पूर्व अमेरिकी राष्ट्रपति डोनाल्ड ट्रम्पले नयाँ राजनीतिक पार्टी खोल्ने कुनै योजना नभएको बताएका छन् । ह्वाइट हाउस छाडेपछिको पहिलो सार्वजनिक सम्बोधनका क्रममा ट्रम्पले नयाँ पार्टी खोल्दा भोट बाँडिने भन्दै नयाँ पार्टी नखोल्ने स्पष्ट पारेका हुन् ।
सम्बोधनका क्रममा उनले २०२४ को राष्ट्रपति चुनावमा समेत उम्मेदबारी दिने संकेत गरे । ट्रम्पले बाइडेनको चर्को आलोचना गर्दै अमेरिकाको पहिलोको नीति अमेरिका अन्तिम बनाइएको बताए । ट्रम्पलाई महाभियोग परीक्षणमा सिनेटबाट उन्मुक्ति दिएको केही सातापछि आज ट्रम्पको सम्बोधन आएको हो ।
आइतबार ओल्र्याण्डोमा कन्जरभेटिभ पोलिटिकल कन्फ्रेन्स एक्सनमा उनको सम्बोधनले रिपब्लिकन पार्टीमा उनले आफ्नो प्रभाव कायमै राख्ने देखिएको छ । बिहिबार सुरु भएको उक्त सम्मेलन ट्रम्प परस्तहरुको सम्मेलन हो । ट्रम्पका छोरा डोनाल्ड ट्रम्प जुनियर र टेक्सासका सिनेटर टेड क्रुज पनि कार्यक्रममा बक्ता रहेका थिए ।
हायात होटलमा तोकिएको समयभन्दा एकघण्टा ढिलो उपस्थीत भएका ट्रम्पलाई उनका समर्थकहरुले स्वागत गरेका थिए । उक्त भींडमा उपस्थीत अधिकांशले मास्क समेत लगाएका थिएनन् ।
सम्बोधनका क्रममा ट्रम्पले चुनावमा धाँधली भएकाले आफूले हारेको बताउन भने छाडेनन् । ट्वीटरमार्फत गलत प्रचारवाजी गरेका कारण ट्रम्पलाई ट्वीटरले लगाएको प्रतिबन्ध भने अझै कायमै छ ।