एक डोज लगाए पुग्ने जोन्सन एण्ड जोन्सन भ्याक्सिनलाई अमेरिकामा प्रयोगको अनुमति
प्रकाशित मिति : फाल्गुन १५, २०७७ शनिबार
एक डोज लगाए पुग्ने कोरोनाबिरुद्धको भ्याक्सिन जोन्सन एण्ड जोन्सनबाट अमेरिकामा प्रयोगका लागि अनुमति दिइएको छ । अमेरिकाको खाद्य तथा औषधी प्रशासन एफडीएले शनिबार यो भ्याक्सिनलाई अमेरिकामा प्रयोगका लागि आपतकालिन अनुमति प्रदान गरेको हो ।
यो अब अमेरिकामा उपलब्ध एकडोज लगाएमात्र पुग्ने पहिलो भ्याक्सिन भएको छ भने अमेरिकामा उपलब्ध कोरोनाबिरुद्धको तेश्रो भ्याक्सिन बनेको छ । जोन्सन एण्ड जोन्सनको भ्याक्सिन विभाग जान्सेनले बनाएको यो भ्याक्सिन सुरक्षित र प्रभावकारीमात्र नभई भण्डारण गर्न र लगाउन समेत सहज रहेको छ । भ्याक्सिन १८ बर्षभन्दा माथिका व्यक्तिलाई लगाउन स्वीकृत गरिएको छ ।
जनाएको छ । बुधबार सार्वजनिक गरेको रिभ्यु अनुशार यो भ्याक्सिन सुरक्षित र प्रभावकारी रहेको तथा अस्पताल भर्ना हुने र मृत्यु हुने अवस्था रोक्न पूर्णरुपमा सफल भएको निष्कर्ष निकालिएको छ ।
जोन्सन एण्ड जोन्सनको भ्याक्सिन लगाएको ४ हप्तापछि कोरोनाबाट बिरामी हुनबाट रोक्न समग्रमा झण्डै ६६ प्रतिशत प्रभावकारी देखिएको छ । सिकिस्त बिरामी हुनबाट रोक्न भने ८६ प्रतिशत प्रभावकारी रहेको छ । अमेरिकामा समग्र प्रभावकारिता ७२ प्रतिशत मापन गरिएको छ । मोडेर्ना र फाइजरका भ्याक्सिन ९५ प्रतिशत प्रभावकारी रहेका छन् ।
अब जोन्सन एण्ड जोन्सनले आगामी सातादेखि नै २ मिलियन डोज डेलिभर गर्नेछ भने २० मिलियन डोज भ्याक्सिन मार्चमा उपलब्ध गराउने प्रतिबद्धता जनाएको छ ।
अमेरिकामा अब मार्चभरमा २४० मिलियन डोज भ्याक्सिन डेलिभर हुने भएको छ । जुन अमेरिकाको झण्डै ४० प्रतिशत जनसंख्यालाई लगाउन प्रयाप्त हुनेछ । अमेरिकामा अहिलेसम्म कुल बयस्कमध्ये २० प्रतिशतले भ्याक्सिन लगाइसकेका छन् ।
फाइजर र मोडेर्नाले मार्चको अन्तिमसम्म कुल २२० मिलियन डोज भ्याक्सिन उपलब्ध गराउने प्रतिबद्धता जनाएका छन् ।
अमेरिकामा चौथो कोरोनाबिरुद्धको भ्याक्सिन आष्ट्राजेनेका अप्रिलमा उपलब्ध हुने अपेक्षा गरिएको छ । स्वीकृति पाउनासाथ ३० मिलियन डोज र अप्रिलको अन्तिमसम्म ५० मिलियन डोज भ्याक्सिन उपलब्ध गराउने आष्ट्राजेनेकाले जनाएको छ ।