बेलायतकी महारानीका पति राजकुमार फिलिप अस्पताल भर्ना
प्रकाशित मिति : फाल्गुन ५, २०७७ बुधबार
बेलायतकी महारानी एलिजाबेथ द्वितियका ९९ बर्षका पति राजकुमार फिलिप बिरामी भएपछि लण्डन अस्पतालमा लगिएको छ । बकिंघम प्यालेसले जारी गरेको वक्तब्य अनुशार फिलिपलाई मंगलबार साँझ अस्पतालमा भर्ना गरिएको हो ।
फिलिप कारमा चढेर अस्पतालमा गएको र इमर्जेन्सी अवस्था नरहेको बताइएको छ । उनी अस्पतालमा पनि आफै हिडेको र उनको बिरामी कोरोना सम्बन्धित नभएको जनाइएको छ । महारानी एलिजाबेथ भने पश्चिम लण्डनको वीन्डसोर क्यासलमा नै रहेको जनाईएको छ ।
बिरामी भएपछि डाक्टरहरुको सल्लाह अनुशार पूर्वसावधानीका लागि फिलिपलाई अस्पताल लगिएको दरबारको वक्तब्यमा उल्लेख छ । फिलिपलाई अझै केही दिन अस्पतालमा नै भर्ना गरिने समेत जनाइएको छ ।
राजकुमार फिलिप सन् २०१७ बाट सार्वजनिक जीवनबाट पछाडि हटेका थिए । त्यो यता उनलाई कैयनपटक अस्पतालमा जानु परेको छ । सन् २०१९ को डिसेम्बरमा पनि उनी आफ्नो पुरानो स्वास्थ्य अवस्थाका कारण अस्पतालमा भर्ना हुनुपरेको थियो ।
महारानी एलिजाबेथ द्वितिय र उनका पति फिलिप पछिल्ला दिनहरुमा वीन्डसोर क्यासलमा बस्दै आएका छन् । गतबर्ष कोरोनाको महामारीको पहिलो छाल आएपछि उनीहरु बकिंघम प्यालेसबाट बसाई सरेर त्यहाँ गएका हुन् । उनीहरुले जनवरीमा कोरोनाबिरुद्धको भ्याक्सिनको पहिलो डोज प्राप्त गरिसकेका छन् ।