महाभियोग असफल भएपछि ट्रम्पबिरुद्ध संघीय अदालतमा मुद्दा दायर
प्रकाशित मिति : फाल्गुन ४, २०७७ मंगलबार
महाभियोग असफल भएपछि पूर्व राष्ट्रपति ट्रम्पबिरुद्ध अदालतमा मुद्दा दायर गरिएको छ । प्रतिनिधिसभाका मुख्य डेमोक्रेटिक नेताहरुले ट्रम्पबिरुद्ध संघीय अदालतमा मुद्दा दायर गराएका हुन् ।
ट्रम्प र उनका वकिल रुडी जुलियानीले जनवरी ६ को हिंशा उक्साउन अति दक्षिणपन्थी समुहहरु प्राउड बोइज र ओथ किपर लगायतसँग मिलेर षड्यन्त्र गरेको अभियोग सहित अदालतमा मुद्दा दायर गरिएको हो । अश्वेतहरुबिरुद्ध श्वेत सर्वोच्चतावादीहरु कु क्लुक्स क्लानको हिंशाबिरुद्ध लड्न बनाइएको गृहयुद्धपछिको कानूनलाई आधार मानेर ट्रम्पबिरुद्ध मुद्दा दायर गरिएको छ ।
मिसिसिपीका डेमोक्रेटिक सांसद बेनी थम्पसनले आफ्नो व्यक्तिगत खर्चमा उक्त मुद्दा दायर गराएका हुन् । जनवरी ६ को क्यापिटल हिल दंगालाई आधार बनाएर ट्रम्पबिरुद्ध संघीय अदालतमा मुद्दा दायर गरिएको यो पहिलो पटक हो । यो मुद्दा अगाडि बढेमा सिनेटको महाभियोग परीक्षणमा पेश नगरिएका अन्य प्रमाणहरु पनि पेश गरिने अपेक्षा गरिएको छ ।
ट्रम्पलाई महाभियोगबाट उन्मुक्ति दिलाउनका लागि सिनेटमा मतदान गरेका कैयन रिपब्लिकन नेताहरु पनि घटनामा ट्रम्प दोषी रहेकोमा सहमत छन् । तर उनीहरुले पदबाट हटिसकेको व्यक्तिलाई महाभियोग लगाउनु असंवैधानिक हुने भन्दै महाभियोगको विपक्षमा मतदान गरेको बताएका छन् ।
सिनेटमा रिपब्लिकन नेता मिच म्याक्कोनेलले राष्ट्रपतिमा रहँदा गरेका कामका लागि ट्रम्प अझै पनि जिम्मेबार हुने बताएका छन् । ट्रम्पले सबै कुराबाट उन्मुक्ति नपाएको र मुलुकमा अपराध गर्नेलाई दण्डित गर्ने न्याय प्रणाली र नागरिक अभियोग रहेको समेत म्याक्कोनेलले बताएका छन् ।
शनिबार सिनेटबाट महाभियोगका सन्दर्भमा उन्मुक्ति पाए लगत्तै ट्रम्पले अमेरिकालाई पुन महान बनाउने देशभक्तिपूर्ण, ऐतिहासिक र सुन्दर अभियान सुरु भएको भन्दै वक्तब्य जारी गरेका थिए । ट्रम्पलाई महाभियोग लगाउन सिनेटमा ६७ भोटको आवश्यक रहेकोमा ५७ भोटमात्र खसेको थियो । जसमा ७ जना रिपब्लिकन सिनेटरहरुले समेत साथ दिएका थिए ।
महाभियोगबाट उन्मुक्ति पाउँदैमा ट्रम्पले सबै कुराबाट अहिले नै उन्मुक्ति पाउने भने देखिएको छैन । जनवरी ६ मा राष्ट्रपति निर्वाचनको परिणाम प्रमाणिकरण गर्नबाट रोक्न क्यापिटल हिलमा दंगाको लागि उक्साएको लगायतका विषयमा ट्रम्पले आगामी साता र महिनाहरुमा अझ धेरैकानूनी लडाईको सामना गर्नुपर्ने देखिएको छ ।
रिपब्लिकन नेता मिच म्याक्कोनेलले उक्त दंगाका लागि ट्रम्प व्यवहारिक र नैतिक रुपमा जिम्मेबार भएको कुरामा कुनै प्रश्न नरहेको बताएका छन् । ट्रम्पलाई उन्मुक्ति दिलाउनका लागि भोट गरेपनि आफ्नो भोटले ट्रम्पको गतिविधिको प्रतिनिधित्व नगर्ने बरु राष्ट्रपतिबाट हटिसकेको एउटा नागरिकबिरुद्ध महाभियोग लगाउन नहुने आफ्नो विचारको प्रतिनिधित्व गर्ने म्याक्कोनेलको भनाई छ ।
जर्जियाका सेक्रेटरीलाई ट्रम्पले गरेको फोनकलका सन्दर्भमा पनि खुला छानविन भइरहेको छ । ट्रम्पले जर्जियाका सेक्रेटरीलाई फोन गरेर चुनावी नतिजा उल्टाउनका लागि आफ्ना पक्षका प्रयाप्त भोटहरु खोज्न दवाव दिएका थिए । त्यस्तै केही डेमोक्र्याट्सहरु ट्रम्पलाई अर्कोपटक ह्वाइटहाउस जानबाट रोक्न फरक खालका बाटाहरु समेत खोजिरहेका छन् ।
ट्रम्पलाई १४ औं संसोधन लगाएर पनि फेरी राष्ट्रपतिमा चुनाव उठ्नबाट रोक लगाउने बाटो खोजिदैछ । संघीयतालाई कमजोर बनाउने पूर्व पदासिनहरुलाई फेरी पदमा पुग्नबाट रोक लगाउनका लागि उक्त प्रावधान ल्याइएको थियो । ट्रम्पलाई पनि यही आधारमा फेरी पदमा पुग्नबाट रोक लगाउनेबारे डेमोक्र्याट्सहरुले विचार गरिरहेका छन् ।
यो प्रावधानले सपथ लिएर संसद सदस्यका रुपमा वा अन्य सरकारी पदमा पुगेको व्यक्तिले विद्रोह वा ध्वंसका लागि उक्साएको खण्डमा त्यसलाई उक्त पदमा अर्को पटक जानका लागि रोक लगाउँछ । १४ औं संसोधनले यो प्रावधान कार्यान्वयनका लागि उचित नियम कानून बनाउनका लागि संसदलाई अधिकार दिएको छ ।