प्रतिनिधिसभामा रिपब्लिकन नियन्त्रण कायम भए कमला ह्यारिसबिरुद्ध महाभियोग लगाउने चेतावनी
प्रकाशित मिति : फाल्गुन २, २०७७ आईतबार
उपराष्ट्रपति कमला ह्यारिस
रिपब्लिकन सिनेटर लिण्डसे ग्राहमले प्रतिनिधिसभामा रिपब्लिकनहरुको नियन्त्रण कायम रहे उपराष्ट्रपति कमला ह्यारिसबिरुद्ध महाभियोग प्रस्ताव ल्याउने चेतावनी दिएका छन् । सिनेटले डोनाल्ड ट्रम्पलाई उन्मुक्ति दिएको एकदिनपछि आइतबार ग्राहमले यस्तो चेतावनी दिएका हुन् ।
उपराष्ट्रपति ह्यारिसले समरमा प्रदर्शनकारीहरुको जमानतका लागि फण्डलाई समर्थन गरेको र उनलाई पनि ट्रम्पलाई क्यापिटल हिल दंगाका लागि उक्साएको जस्तै अभियोग लगाउन सकिने ग्राहमले बताए । यदि ट्रम्पबिरुद्धको महाभियोगको जस्तै मोडल प्रयोग गर्ने हो भने प्रतिनिधिसभामा रिपब्लिकनको नियन्त्रण कायम भएको बेला कमला ह्यारिसले पनि उन्मुक्ति पाउन नहुने उनको भनाई छ ।
कमला ह्यारिसले पनि दंगाकारीलाई जमानत सहयोग गरेको र दंगाकारीले सडकमा मान्छेका टाउको फोरेको उनको तर्क छ । ट्रम्पबिरुद्ध महाभियोग ल्याएर अमेकिरामा प्यान्डोराको बाकस खोलिएको उनले बताए । प्यान्डोराको बाकस खोलेपछि संसारमा दुख, पीडा र समस्याहरु बाहिर आएको ग्रिक कथा रहेको छ ।
ग्राहमले मिनेसोटा फ्रिडम फण्डमा कमला ह्यारिसको समर्थनको विरोध गरेका छन् । उक्त फण्डले प्रदर्शनकारीहरुलाई जमानतका लागि सहयोग पुगेको उनको भनाई छ । ग्राहमले यसअगाडि पनि कमला ह्यारिसबिरुद्धको महाभियोगको कुरा उठाएका थिए ।
शनिबारमात्र पूर्व राष्ट्रपति डोनाल्ड ट्रम्पबिरुद्धको महाअभियोग परीक्षणमा सिनेटले ट्रम्पलाई उन्मुक्ति दिएको थियो । क्यापिटल हिल दंगा भड्काउन उक्साएको अभियोगमा ट्रम्पबिरुद्ध महाभियोग प्रस्ताव अगाडि बढाइएको थियो ।
सिनेटमा शनिबार भएको मतदानमा महाभियोगका पक्षमा ५७ जनाले मतदान गरेका थिए भने ४३ जनाले ट्रम्पलाई उन्मुक्ति दिने पक्षमा मतदान गरेका थिए । ट्रम्पबिरुद्धको महाभियोग पारित गर्नका लागि दुईतिहाई मत अर्थात् ६७ मतको आवश्यकता पर्ने भएपनि जम्मा ५७ मत खसेपछि ट्रम्पले उन्मुक्ति पाएका हुन् ।
७ जना रिपब्लिकन सिनेटरहरुले ट्रम्पलाई महाभियोग लगाउने पक्षमा मतदान गरेपनि उक्त मत प्रयाप्त हुन सकेन । हाउसबाट पारित महाभियोगमा सिनेटमा उन्मुक्ति पाएको ट्रम्पले यो दोश्रो पटक हो । ट्रम्पलाई महाभियोग लगाउने पक्षमा मतदान गर्ने रिपब्लिकन सिनेटरहरु बिल क्यासिडी, सुजन कोलिन्स, रिचार्ड बर, लिसा मुर्कोस्की, मिट रोम्नी, बेन सासे र प्याट टोमी रहेका छन् ।
ट्रम्प अमेरिकी इतिहासमा हाउसबाट दुईपटकसम्म महाभियोग लगाइएका पहिलो राष्ट्रपति हुन् । तर दुईपटक नै सिनेटबाट भने यो प्रस्ताव पारित हुन नसकेपछि ट्रम्पले उन्मुक्ति पाउन सफल भए । महाभियोग पारित भएको भए सामान्य बहुमतबाट ट्रम्पलाई सिनेटबाट भविश्यमा राष्ट्रपतिमा उठ्न रोक लगाउने प्रावधान पारित गर्ने तयारी थियो ।
तर उन्मुक्ति पाएकाले अब ट्रम्पका लागि भविश्यमा राष्ट्रपतिमा उठ्न पनि प्रतिबन्ध नलाग्ने भएको छ । ७४ बर्षका ट्रम्पले २०२४ को राष्ट्रपति चुनावमा उम्मेदवारी दिन सक्ने भएका छन् । झण्डै ५ दिनसम्मको परीक्षणपछि सिनेटमा महाभियोग परीक्षण शनिबार समाप्त भएको थियो ।