न्युयोर्क सिटीमा ट्रेनभित्र चक्कु प्रहारबाट दुईजनाको हत्या, अहिलेसम्म कोही पक्राउ परेनन्
प्रकाशित मिति : फाल्गुन १, २०७७ शनिबार
न्युयोर्क सिटीको ‘ए’ ट्रेनभित्र गएराती दुईवटा चक्कु प्रहारका घटना भएका छन् । चक्कु प्रहारबाट फरक फरक घटनामा दुईजनाको मृत्यु भएको प्रहरीले जनाएको छ । प्रहरीले घटनाबारे अनुसन्धान भइरहेको जनाएको छ ।
शुक्रबार राती साढे ११ बजेतिर ‘ए’ ट्रेनभित्र एकजना व्यक्तिलाई घाँटी र पेटमा कैयनपटक चक्कु प्रहार भएको थियो । क्वीन्सको फार रकवेमा मोट एभिन्यु स्टेशनमा चक्कु प्रहार भएको जनाइएको छ । ती व्यक्तिलाई घटनास्थलमा नै मृत घोषणा गरिएको थियो ।
त्यसको दुईघण्टापछि नै राती साढे १ बजे वेष्ट २०७ स्ट्रीट र ब्रोडवेमा ए ट्रेनमा एकजना महिलामाथि चक्कु प्रहार भएको छ । ४४ बर्षकी ती महिलाको शरीरका विभिन्न भागमा चक्कु हानिएको थियो । उनलाई पनि घटनास्थलमा नै मृत घोषणा गरिएको थियो ।
मृतक दुबै जना व्यक्ति होमलेस भएको जनाइएको छ । दुबै चक्कु प्रहारका घटना सम्बन्धित भए नभएकोबारे प्रहरीले अनुसन्धान गरिरहेको छ । तर उक्त घटनाका सन्दर्भमा अहिलेसम्म कसैलाई पनि पक्राउ गरिएको छैन ।