बर्माका कारण अमेरिकाको राष्ट्रिय सुरक्षामा खतरा भएको भन्दै संकटकाल घोषणा, अमेरिका प्रवेश निषेध
प्रकाशित मिति : माघ २९, २०७७ बिहीबार
बर्माका वर्तमान अवस्थाका कारण अमेरिकाको राष्ट्रिय सुरक्षा र विदेशनीतिमा असाधारण र अनियमित खतरा भएको भन्दै राष्ट्रपति जो बाइडेनले संकटकालको घोषणा गरेका छन् । उक्त संकटकालले बर्माको सत्ता कब्जामा संलग्न र सहयोगीहरुको सबै अमेरिकी सम्पत्तिहरुमा पहुँच कायममा रोक लगाउनेछ भने अमेरिका प्रवेशमा समेत प्रतिबन्ध लगाउनेछ ।
बर्माको अर्थतन्त्रको रक्षा क्षेत्रमा काम गर्नेहरु, बर्मामा राजनीतिक प्रकृया वा अवमूल्यन गर्ने नीति वा कार्यमा संलग्नहरु, बर्माको शान्ति सुरक्षा र स्थायीत्वमा खतरापूर्ण नीति र कार्यमा संलग्नहरु, बर्मामा बाक स्वतन्त्रताको उल्लंघनमा संलग्नहरु, मानवअधिकारको उल्लंघन र यातनामा संलग्नहरुलाई बाइडेनले प्रतिबन्धको घोषणा गरेका छन् ।
त्यस्तै बर्माको सैन्य वा सुरक्षा क्षेत्रका नेता वा अधिकारीहरु, फेबु्रअरी २ पछिको बर्माको सरकारका नेता वा अधिकारीहरु, उनीहरुका दम्पत्ति र बयस्क छोराछोरीहरु लगायतलाई पनि प्रतिबन्ध लगाइएको छ । यस्तो प्रतिबन्ध अनुशार अमेरिकाको क्षेत्राधिकारमा पर्ने कुनै सम्पत्ति वा रकम ट्रान्सफर गर्न, तिर्न, निकाल्न वा कुनै पनि प्रकारको पहुच कायम गर्नमा रोक लगाइएको छ ।
त्यस्तै बर्माको सैन्य कूमा संलग्न वा सहयोगी बनेकाहरुलाई कुनै पनि प्रकारको सेवा, सामान वा रकममा पहुँच कायम गर्नमा पनि अमेरिकाले प्रतिबन्ध लगाएको छ । बर्माबाट आप्रवासी वा गैर आप्रवासी भिसामा अमेरिका आउनमा समेत रोक लगाइएको छ । तर अमेरिकाको राष्ट्रिय रुचीभित्र पर्ने र राष्ट्रिय रुचीको विपरित नहुनेहरुलाई भने प्रवेशमा रोक नलगाइने जनाइएको छ । त्यसको निर्धारण अमेरिकी विदेश मन्त्रालय र गृह मन्त्रालयले गर्ने जनाइएको छ । यसरी अमेरिका आउन रोक लगाइनेहरुलाई सन् २०११ को कार्यकारी आदेश ८६९३ को सेक्सन १ लगाइनेछ ।
त्यस्तै सैन्य कूमा संलग्न वा सहयोगी बनेकाहरुलाई अमेरिकाबाट व्यक्तिगत वा संस्थागत डोनेशन गर्नमा समेत प्रतिबन्ध लगाइएको छ । सैन्य कूमा संलग्न वा सहयोगी बनेकाहरुका अमेरिकामा रहेको कुनै पनि पार्टनरसिप, एसोसिएसन, ट्रस्ट, संयुक्त कम्पनी, परियोजना र अन्य संस्थाहरुमा पहुचमा प्रतिबन्ध लगाइएको हो ।
यसबारेमा बाइडेनले हाउस स्पीकर र सिनेट प्रेसिडेण्टका नाममा समेत पत्राचार गरिसकेका छन् ।
उक्त पत्रको पूर्ण पाठ यहाँ पढ्नुहोस्