१४ सय डलरको राहत चेकका लागि बाइडेनबाट ७५ हजार डलर आम्दानीको थ्रेसहोल्डलाई समर्थन
प्रकाशित मिति : माघ २७, २०७७ मंगलबार
अमेरिकी राष्ट्रपति जो बाइडेनले १४ सय डलरको राहत चेकका लागि ७५ हजार डलर आम्दानीको थ्रेसहोल्डलाई समर्थन गरेका छन् । मंगलबार बाइडेनले ७५ हजारभन्दा कम आम्दानी भएकाहरुलाई १४ सय डलरको राहत उपलब्ध गराउने बिलमा आफ्नो समर्थन रहेको बताए ।
थ्रेसहोल्डका विषयमा विवाद भइरहेको बेलामा बाइडेनले ७५ हजारको आम्दानीको थ्रेसहोल्डमा आफ्नो अडान कायम राखेका हुन् । केही मध्यपन्थी डेमोक्र्याट्सहरुले आम्दानीको थ्रेसहोल्ड ५० हजार कायम राख्नुपर्ने बताउँदै आएका छन् । केही रिपब्लिकनहरु भने ४० हजारभन्दा कम आम्दानीको थ्रेसहोल्ड राख्नुपर्ने पक्षमा छन् ।
बाइडेनले १४ सयको राहत चेकका अतिरिक्त काम गुमाएकाहरुलाई साप्ताहिक ४ सय डलरको प्रावधान पारित गर्न समेत आव्हान गरेका छन् ।
सोमबार राती डेमोक्र्याट्सहरुले सार्वजनिक गरेको बिलमा पहिलेकै प्रावधान अनुशार १४ सय डलर उपलब्ध गराउने उल्लेख छ भने आम्दानीको थ्रेसहोल्ड घटाउनुपर्ने मागलाई अस्वीकार गरिएको छ । बिलको ड्राफ्टमा ७५ हजारभन्दा कम आम्दानी भएका एकल र १ लाख ५० हजारभन्दा कम आम्दानी भएका दम्पत्तिले राहत चेक पूर्णरुपमा प्राप्त गर्ने उल्लेख छ ।
सोमबार राती सार्वजनिक बिलको ड्राफ्ट
डेमोक्र्याट्सहरुले गत साता बजेट प्रकृया पारित गरिसकेकाले अब यो राहत प्याकेज रिपब्लिकनको सहमति विना सामान्य बहुमतबाट समेत पारित गर्न सक्नेछन् । अर्थात् यसलाई पारित गर्न फिलिबस्टर ६० भोटको आवश्यकता पर्नेछैन ।