हरेक बच्चाका लागि ३६ सय डलर सम्मको व्यवस्थासहितको बिल डेमोक्र्याट्सबाट सार्वजनिक
प्रकाशित मिति : माघ २६, २०७७ सोमबार
डेमोक्र्याट्सहरुले १० औं मिलियन अमेरिकनका हरेक बच्चाका लागि ३ हजार डलरको व्यवस्था गर्ने बिल आज सोमबार औपचारिक रुपमा सार्वजनिक गरेका छन् । २२ पेज लामो यो बिल पारित भएमा अमेरिकन परिवारका लागि नगद सुविधालाई नाटकीय रुपमा बृद्धि गर्नेछ ।
बिलमा हरेक बच्चाका लागि मासिक २ सय ५० डलर परिवारहरुलाई पठाउने उल्लेख छ । प्रस्ताव अनुशार आइआरएसले ६ बर्षभन्दा कम उमेरका बच्चाको सन्दर्भमा बर्षमा ३६ सय डलर पठाउने छ । ६ देखि १७ बर्षबीचको बच्चाका सन्दर्भमा ३ हजार डलर पठाउनेछ ।
बार्षिक ७५ हजार डलरभन्दा कम आम्दानी भएको व्यक्ति र संयुक्त फाइल गरेकाहरुका सन्दर्भमा एकलाख ५० हजार भन्दा कम आम्दानी भएका दम्पत्तिले आफ्ना बच्चाका सन्दर्भमा पूरै रकम पाउनेछन् । तर त्यो भन्दा बढी आम्दानी हुनेहरुका सन्दर्भमा भने रकम घट्दै जानेछ ।
यो रकम आगामी जुलाईबाट मासिक रुपमा पठाउने योजना रहेको छ । आईआरएसलाई तयारीका लागि प्रयाप्त समय उपलब्ध गराउनका लागि जुलाई सम्म ढिलो हुने जनाइएको छ ।
डेमोक्रेटिक सांसद रिचार्ड निलले अगाडि बढाएको यो बिल पारित हुने अपेक्षा गरिएको छ । महामारीले परिवारहरुलाई गरिबीमा धकेलेकाले यो बिल आवश्यक भएको सांसद निलको भनाई छ ।
तथ्यांक अनुशार विकशित देशहरुमा अमेरिकामा बालबालिका गरिबीको दर उच्च रहेको छ । अमेरिकाले अन्य क्षेत्रको तुलनामा बालबालिकाको सुविधाका लागि कम रकम खर्च गर्दै आएको छ । अहिले एकबर्षका लागि यो सुविधा ल्याउन खोजिएपनि यो सुविधालाई स्थायी बनाउन प्रयास गरिने सांसदहरुले बताएका छन् ।
आईआरएसले यो रकम जुलाई १ बाट त्यसरी नै पठाउन सुरु गर्नेछ, जसरी राहत चेक पठाएको थियो । बुबाआमाहरुले आईआरएसलाई ट्याक्स तिर्न बाँकी भएको भएतापनि यो रकम त्यसमा कटाइनेछैन । उनीहरुले ६ बर्षमुनीका बच्चाका सन्दर्भमा मासिक ३ सय र अन्यका सन्दर्भमा २ सय ५० डलर प्राप्त गर्नेछन् ।
वर्तमान चाइल्ड ट्याक्स क्रेडिटले १७ बर्षभन्दा कम उमेरका हरेक बच्चाका लागि २ हजार डलरसम्म प्रदान गर्छ । केही रिपब्लिकनहरुले चाइल्ड ट्याक्स क्रेडिट बढाउने पक्षमा समेत आफूलाई उभ्याएका छन् । युटाहका सिनेटर मिट रोम्नीले साना केटाकेटीहरुका लागि बार्षिक ४२ सय र स्कुलजाने उमेरकाहरुका लागि ३ हजार ट्याक्स क्रेडिटको प्रस्ताव गरेका थिए ।