६० हजारसम्म आम्दानी हुनेलाई १४ सयको राहत चेक दिनुपर्छ: अर्थमन्त्री
प्रकाशित मिति : माघ २६, २०७७ सोमबार
अमेरिकी ट्रेजरी सेक्रेटरी (अर्थमन्त्री) जानेट यालेनले बार्षिक ६० हजारसम्म आम्दानी हुने अमेरिकनहरु १४ सयको राहत चेकका लागि योग्य हुनुपर्ने बताएकी छिन् । आगामी राहत चेक प्राप्त गर्ने आम्दानीको थ्रेसहोल्डबारे छलफल भइरहँदा यालेनको यो भनाई सार्वजनिक भएको हो । रिपब्लिकनहरु आम्दानीको थ्रेसहोल्ड ४० हजार राख्नुपर्ने पक्षमा छन् ।
राष्ट्रपति जो बाइडेनको १ दशमलव ९ ट्रिलियन डलरको राहत प्याकेजमा सुरुमा आम्दानीको थ्रेसहोल्ड ७५ हजार डलर तोकिएको थियो । तर आवश्यक नभएकाहरुले पनि रकम पाएको भन्दै यो थ्रेसहोल्डलाई घटाउनेबारे छलफल भइरहेको छ । जस अनुशार विगतमा राहत चेक पाएका सबैले १४ सय डलरको राहत चेक नपाई आम्दानीको थ्रेसहोल्ड पुग्नेलेमात्र पाउने सम्भावना रहेको छ ।
मध्यमार्गी डेमोक्रेटिक सांसदहरुले आम्दानीको थ्रेसहोल्ड ५० हजार डलर राख्नुपर्ने बताएका छन् । वेष्ट भर्जिनियाका डेमोक्रेटिक सांसद जो मन्चिनले आम्दानीको थ्रेसहोल्ड ५० हजार डलर राख्नुपर्ने माग गरेका छन् । दोश्रो चरणको राहत चेक सहितको प्याकेज यसै महिना पारित गर्ने हाउस स्पीकर न्यान्सी पेलोसीले संकेत गरेकी छिन् ।
पत्रकार सम्मेलनमा उच्च डेमोक्रेटिक सांसदहरुले आगामी दुईसातामा सिनेटमा प्याकेज पठाउने बताएका छन् । सिनेटमा रिपब्लिकनहरुले राहत चेक १४ सय डलरभन्दा कम गर्नुपर्ने बताएका छन् । तर राष्ट्रपति जो बाइडेनले १४ सय डलरको प्रतिज्ञा भइसकेकाले त्यसमा रकम नघटाउने बताएका छन् ।
अमेरिकनहरुले १४ सय डलरको राहत चेक मार्चमा पाउने देखिएको छ । डेमोक्र्याट्सहरु रिपब्लिकन सांसदहरुको समर्थन विना नै बजेट प्रकृयाबाट राहत प्याकेज पारित गर्न अगाडि बढिसकेका छन् ।