रातभरको ‘भोट अ रामा’ पछि सिनेटबाट १.९ ट्रिलियनको राहत रिजोलुसन पारित
प्रकाशित मिति : माघ २३, २०७७ शुक्रबार
रातभरको ‘भोट अ रामा’ पछि सिनेटबाट १ .९ ट्रिलियन डलरको राहत रिजोलुसन पारित भएको छ । रातभरको प्रकृयापछि शुक्रबार विहान रिजोलुशन पारित भएको हो ।
उपराष्ट्रपति कमला ह्यारिसको टाइब्रेक मतपछि ५१-५० मतले रिजोलुसन पारित भएको हो । उपराष्ट्रपति ह्यारिसले पहिलोपटक टाइब्रेक मतको प्रयोग गर्नुपरेको हो । त्यसपछि विहान ६ बज्नुभन्दा केहीबेर अगाडिमात्र ५० जना डेमोक्रेटिक सांसदको समर्थनमा रिजोलुसन पारित भयो ।
बजेट रिजोलुशन पारित गर्नु रिपब्लिनको सहायताविना नै फिलिबस्टर ६० भोट नचाहिनेगरी सामान्य बहुमतबाटै राहत प्याकेज पारित गर्नका लागि एउटा मुख्य भाग हो । अब सिनेटमा रिपब्लिकनको सहायता विना पनि सामान्य बहुमतबाट राहत प्याकेज पारित हुनेछ । रिपब्लिकनले प्रकृयालाई ढिलो बनाउन श्रृंखलाबद्ध भोटहरु गर्नुपर्ने ‘भोट अ रामा’ प्रकृयामा जानका लागि डेमोक्र्याट्सहरुलाई बाध्य पारेका थिए ।
प्रतिनिधिसभाबाट बजेट रिजोलुसन यसैसाताको सुरुमा पारित भइसकेको छ । यो रिजोलुसनले अब सदनमा सामान्य बहुमतले पारित गर्ने राहत प्याकेज ल्याउनका लागि गाडीको काम गर्दछ । अन्तिम राहत प्याकेजमा पनि छलफलका लागि २० घण्टा छुट्याइएनेछ । त्यसपछि दुबै सदनमा राहत प्याकेज नै पारित गर्नका लागि मतदान हुनु अगाडि अर्को ‘भोट अ रामा’ हुनेछ ।
के हो ‘भोट अ रामा’ ?
‘भोट अ रामा’ सिनेटमा अपनाइने एउटा विधि हो । जब सिनेटमा बहुमतप्राप्त दलले कुनै विवादित बिल पारित गर्न खोज्छ, त्यतीबेला अर्को पक्षले राजनीतिक दबाब श्रृजना गर्नका लागि भोट अ रामा प्रकृयामा जान बाध्य पार्छ । यो प्रकृया प्राय रातभर नै चल्ने गर्छ । यो प्रकृया अन्तरगत सिनेटरहरुले विभिन्न प्रकारका सुधारका प्रस्तावहरु ल्याउन सक्छन् ।
ती प्रस्तावहरुमा एकपछि अर्को गर्दै मतदान हुन्छ । सिनेटरहरुलाई हरेक प्रस्तावमा पक्ष वा विपक्षमा मतदान गर्नका लागि १० मिनेटमात्र समय छुट्याइएको हुन्छ ।
के के संसोधन प्रस्ताव पारित भए ?
सिनेटमा संघीय ज्याला न्यूनतम घण्टाको १५ डलर बनाउने बाइडेनको योजनाको मुख्य भाग सिनेटबाट अस्वीकृत भएको छ । सिनेटरहरुले महामारीको बेलामा ज्याला बढाउनमा रोक लगाउने आयोवाका रिपब्लिकन सिनेटरको संसोधन प्रस्तावलाई पारित गरेको छ ।
रिपब्लिकनले ल्याएका कैयन संसोधनका प्रस्तावहरु यो प्रकृयाबाट रातभर अस्वीकार गरियो । कतिपय सुधारका प्रस्तावले दुईदलीय समर्थन पनि प्राप्त गरे । रेष्टुरेण्ट उद्योगलाई सहयोग गर्ने रिपब्लिकन सिनेटरको एउटा संसोधन प्रस्ताव ९० भोटले स्वीकृत भयो ।
त्यस्तै राहत चेक पाउने सन्दर्भमा उच्च आम्दानी भएका नागरिकलाई रोक्ने डेमोक्रेटिक सिनेटर जोन मन्चिन र रिपब्लिकन सिनेटर सुजन कोलिन्सको संसोधनलाई पनि स्वीकार गरिएको छ । तर उच्च आम्दानी कति भन्ने तय गरिएको छैन । कागजपत्रविहिनलाई राहत चेक दिनबाट रोक्ने रिपब्लिकन सिनेटरको संसोधन प्रस्ताव पनि पारित भएको छ ।
अब पारित भएका सबै संसोधनलाई समेटेर राहत प्याकेज सदनमा आउनेछ ।