फेब्रुअरी ११ बाट अमेरिकामा वालग्रिन, सीभीएस, राइट एड लगायतका फार्मेसीबाटै भ्याक्सिन
प्रकाशित मिति : माघ २०, २०७७ मंगलबार
फेब्रुअरी ११ बाट अमेरिकामा फार्मेसीबाटै कोरोनाबिरुद्धको भ्याक्सिन वितरण गरिने भएको छ । भ्याक्सिनमा सबै योग्यहरुको पहुँच कायम गर्नका लागि बाइडेन प्रशासनले नयाँ व्यवस्था गर्न लागेको हो ।
योग्यहरुले देशभरका तय भएका फार्मेसीहरुबाट भ्याक्सिन प्राप्त गर्न सक्ने भएका छन् । २१ वटा राष्ट्रिय फार्मेसी पार्टनरहरु र स्वतन्त्र फार्मेसीहरुको नेटवर्कसँगको सहकार्यमा भ्याक्सिन वितरण गरिने भएको छ । जसमा देशभरका झण्डै ४० हजार फार्मेसीहरु सुचीकृत छन् ।
यो कार्यक्रम अन्तरगतको पहिलो चरणमा देशभरका छानिएका फार्मेसीहरुले योग्यहरुलाई भ्याक्सिन वितरण गर्नका लागि निशुल्क तर सिमित भ्याक्सिनका शीशीहरु पाउनेछन् । सुरुको चरणमा केही फार्मेसीहरुमा भ्याक्सिन सिमित भ्याक्सिन उपलब्ध हुने भएकाले नजिकको फार्मेसीमा भ्याक्सिन उपलब्ध भए नभएको उनीहरुकै वेवसाइटमा गएर हेर्न सुझाव दिइएको छ ।
भ्याक्सिनका लागि छनौट भएका फार्मेसी नेटवर्कहरुमा वालग्रिन, सीभीएस, वालमार्ट, राइट एड, कोस्ट्को लगायत रहेका छन् । सुरुको चरणमा भने देशभरका झण्डै साढे ६ हजार फार्मेसीहरुमा मात्र झण्डै १ मिलियन डोज उपलब्ध गराइने जनाइएको छ ।
त्यस्तै राज्यहरुमा पठाउने भ्याक्सिनको डोजमा पनि बाइडेन प्रशासनले बृद्धि गर्ने भएको छ । हरेक साता कम्तीमा साढे १० मिलियन भ्याक्सिनका डोजहरु डेलिभर गरिने जनाइएको छ ।
अहिलेसम्म अमेरिकामा ५२ मिलियन भन्दा धेरै भ्याक्सिनका डोजहरु वितरण गरिसकिएको छ । बाइडेन प्रशासनले आफ्ना एकसयदिनमा एकसय मिलियनलाई भ्याक्सिन लगाउने योजना बनाएको छ । डिसेम्बरको दोश्रोसातादेखि अहिलेसम्म जम्मा साढे २६ मिलियनलेमात्र भ्याक्सिन प्राप्त गरेका छन् ।
न्युयोर्कमा ६५ बर्षभन्दा माथिका सबै, ग्रोसरी स्टोरमा ग्राहकतिर अनुहार फर्काएर काम गर्नुपर्नेहरु, अग्नीनियन्त्रक, प्रहरी, जनसुरक्षा संचारमा काम गर्नेहरु, कोर्ट अफिसरहरु, जेलमा काम गर्नेहरु, शिक्षण संस्था र चाइल्ड केयरमा काम गर्नेहरु, सार्वजनिक यातायातमा काम गर्नेहरु, होमलेस सेल्टरमा रहनेहरु भ्याक्सिन प्राप्त गर्न योग्य छन् ।