अमेरिकामा साढे २ करोडले लगाए कोरोनाबिरुद्धको भ्याक्सिन, अगस्तसम्म सबैलाई
प्रकाशित मिति : माघ १८, २०७७ आईतबार
अमेरिकामा झण्डै साढे २ करोडले कोरोनाबिरुद्धको भ्याक्सिन पाइसकेको सीडीसीले जनाएको छ । शनिबार विहानसम्मको तथ्यांक अनुशार २ करोड ४० लाख ६४ हजार १ सय ६५ जनाले कोरोनाबिरुद्धको भ्याक्सिन प्राप्त गरिसकेका छन् । त्यसमा दुबै डोज प्राप्त गर्नेहरु ५२ लाख ५९ हजार ६ सय ९३ जना रहेका छन् ।
अमेरिकामा झण्डै ५० मिलियन अर्थात् ४ करोड ९९ लाख ३२ हजार ८ सय ५० डोज भ्याक्सिन डेलिभर भइसकेको छ । अमेरिकामा कुल संक्रमितहरुको संख्याको तुलनामा भ्याक्सिन प्राप्त गर्नेहरुको संख्या अझै कम रहेको छ । अमेरिकामा कुल संक्रमितको संख्या झण्डै २ करोड ५८ लाख पुगेको छ । मृतकको संख्या पनि ४ लाख ३५ हजार नाघिसकेको छ ।
न्युयोर्कमा अहिलेसम्म झण्डै ३० लाख भ्याक्सिनका डोज डेलिभर गरिएको छ भने झण्डै १५ लाखले भ्याक्सिन पाइसकेका छन् । न्युयोर्कमा दुईवटै डोज प्राप्त गर्नेहरुले सबा तीनलाख नाघिसकेका छन् । अमेरिकामा उल्लेख्य संख्यामा नेपालीहरुले पनि कोरोनाबिरुद्धको भ्याक्सिन लगाइसकेका छन् । भ्याक्सिन लगाउनेहरुमध्ये केहीले सामान्य ज्वरो आउने र जिउ दुख्ने जस्ता साइड इफेक्टको सामना गरेपनि गम्भिर प्रकारका साइड इफेक्ट भने कसैलाई देखिएको समाचार प्राप्त भएको छैन ।
नवनिर्वाचित अमेरिकी राष्ट्रपति जो बाइडेनको कार्यकालको सुरुको १ सय दिनमा एक सय मिलियन कोरोनाबिरुद्धको भ्याक्सिनका डोज वितरणको योजना बनाइएको छ । यो योजना सम्भव भएको अमेरिका बरिष्ठ सरुवा रोग विशेषज्ञ डाक्टर एन्थोनी फाउचीले बताएका छन् । फाउचीले बाइडेनको मेडिकल सल्लाहकारका रुपमा काम गर्दैछन् ।
यदि अमेरिकामा ७० देखि ८५ प्रतिशतले भ्याक्सिन प्राप्त गरेको खण्डमा हर्ड इम्युनिटीको छाता प्राप्त हुनसक्ने विश्वास गरिएको छ । अमेरिकामा एकातिर भ्याक्सिन वितरण तीब्र गतिमा भइरहेको छ भने अर्कोतर्फ संक्रमितहरुको संख्या पनि निकै डरलाग्दो रहेको छ ।
बाइडेन प्रशासनले भ्याक्सिनका थप २ सय मिलियन डोजहरु किन्ने भएको छ । जस अनुशार अमेरिकाले फाइजर र मोडेर्नाका कुल ६ सय मिलियन भ्याक्सिन प्राप्त गर्ने भएको छ । जुन अमेरिकाको जनसंख्यालाई प्रयाप्त हुने अपेक्षा गरिएको छ । आगामी अगस्तसम्म अमेरिकामा सबैले भ्याक्सिन प्राप्त गर्ने अपेक्षा गरिएको छ ।