एकतिहाई सानो नयाँ राहत प्याकेज प्रस्तावसहित १० रिपब्लिकन सिनेटरको ह्वाइटहाउसलाई पत्र
प्रकाशित मिति : माघ १८, २०७७ आईतबार
डेमोक्र्याट्सहरुले प्रस्ताव गरेको भन्दा झण्डै एकतिहाई सानो नयाँ राहत प्याकेज प्रस्तावसहित १० जना रिपब्लिकन सिनेटरले ह्वाइटहाउसलाई पत्र लेखेका छन् । १० जना रिपब्लिकन सिनेटरको समर्थन भएमा फिलिबस्टर मतबाट प्याकेज पारित हुने सम्भावना भएकाले दुईदलीय सहमतिका लागि उनीहरुले ह्वाइटहाउसलाई पत्र लेखेका हुन् ।
रिपब्लिकनले समर्थन नगरेको खण्डमा बजेट प्रकृयाबाट ५१ मतबाटै राहत प्याकेज पारित गर्ने डेमोक्र्याट्सहरुले तयारी गरिरहँदा राष्ट्रपति जो बाइडेनसँग छलफलका लागि अनुरोध गर्दै पत्र पठाइएको हो । बाइडेनको १ दशमलव ९ ट्रिलियनको राहत प्याकेजको साटो रिपब्लिकन सिनेटरले ६ सय बिलियनको मात्र राहत प्याकेज प्रस्ताव गरेका छन् । उनीहरुले प्याकेज प्रस्ताव सोमबार सार्वजनिक गर्ने योजना बनाएका छन् ।
उनीहरुले १४ सय डलरको राहत चेकको साटो १ हजार डलरको राहत चेकको व्यवस्थासहित राहत प्याकेज प्रस्ताव ल्याउन लागेको जनाइएको छ । ह्वाइटहाउसलाई पठाएको पत्रमा रिपब्लिकन सिनेटरहरु टोड यांग, माइक राउण्डस, मिट रोम्नी, शेली मुर क्यापिटो, जेरी मोरन, थम टिल्स लगायतले हस्ताक्षर गरेका छन् ।
राष्ट्रपति जो बाइडेनको उच्च प्राथमिकतामा रहेको १ दशमलव ९ ट्रिलियन डलरको राहत प्याकेज प्रतिनिधिसभाबाट पारित गर्न त सहज छ । तर सिनेटमा फिलिबस्टर भोटको आवश्यकता पर्ने भएकाले उक्त ६० भोट जुटाउनका लागि १० जना रिपब्लिकन सांसदहरुलाई मनाउनुपर्ने हुन्छ । त्यसका लागि प्याकेजको रकम घटाउन रिपब्लिकन सांसदहरुले माग गरेका छन् । अन्यथा ६० भोटको थ्रेसहोल्डलाई बाइपास गर्नका लागि बजेट प्रकृया अगाडि बढाउनुपर्ने हुनसक्छ ।
सबैभन्दा उदार मध्येकी एक रिपब्लिकन सिनेटर सुजन कोलिन्सले आफूले भ्याक्सिन फण्ड बढाउनुपर्नेमा सहानुभूति राख्ने भएपनि यति ठूलो प्याकेज आवश्यक नभएको बताएकी छिन् । भर्खरै ९ सय बिलियनको राहत प्याकेज पारित भएको अवस्थामा तत्कालै ठूलो प्याकेज पारित गर्न आवश्यक नभएको उनको भनाई छ ।
त्यस्तै उदार मानिने रिपब्लिकन सिनेटर लिसा मुर्कोस्कीले बाइडेनको आव्हान महत्वपूर्ण भएको बताएपनि ९ सय बिलियनको राहत प्याकेजको मसी सुक्न नपाएको बताएकी छिन् । उनले उचित रकमको राहत प्याकेज आवश्यक हुने बताएकी छिन् ।
त्यस्तै रुढीबादी र पार्टीलाइन विपरित अगाडि बढ्ने रिपब्लिकन सिनेटर मिट रोम्नीले अर्को एक ट्रिलियन वा ५ सय बिलियनको विशाल राहत प्याकेज तत्काल चाहिने पक्षमा आफू नरहेको बताएका छन् । अर्थतन्त्र कोरोनाका कारण पछाडि परेको तर राहत नदिएका कारण पछाडि नपरेको बताएका छन् । सबैले भ्याक्सिन लगाएपछि अर्थतन्त्र सुदृढ हुने उनले बताए ।
यदि रिपब्लिकनको समर्थन प्राप्त नभएको खण्डमा डेमोक्र्याट्सले फिलिबस्टर भोटलाई बाइबास गर्ने संसदीय विधि अपनाउन सक्नेछन् । बजेट प्रावधान अनुशार अगाडि बढेको खण्डमा सामान्य बहुमतबाट पनि बिल पारित हुनसक्नेछ । तर सकभर डेमोक्र्याट्सहरु दुईदलीय सहमति खोजेर अगाडि बढ्ने पक्षमा रहेका छन् ।
सिनेटको बजेट कमिटिको अध्यक्षता गर्ने सिनेटर बर्नी स्याण्डर्सले पनि रिपब्लिकनलाई सहमत बनाउने प्रयास फलदायी नभएको खण्डमा फिलिबस्टर भोटलाई बाइपास गर्ने बजेटको संसदीय प्रकृया अपनाउनुपर्ने बताएका छन् ।
बाइडेनको १ दशमलव ९ ट्रिलिनयको प्याकेज योजनामा १४ सय डलरको राहत चेकका अतिरिक्त ४ सय बिलियन डलर विद्यालय खोल्न र भ्याक्सिनका लागि छुट्याइएको छ । त्यस्तै काम गुमाएकाहरुलाई अतिरिक्त साप्ताहिक ४ सय डलरको प्रावधान रहेको छ ।
कतिपय प्रावधानहरु ट्याक्स र खर्चसँग सम्बन्धित भएको खण्डमा एक आर्थिक बर्षमा एकपटक बजेट प्रकृयाबाट पारित गर्नसकिने जनाइएको छ । तर संघीय पारिश्रमिक कम्तीमा प्रतिघण्टा १५ डलर बनाउने जस्ता नियामक प्रावधानहरुका लागि भने फिलिबस्टर ६० भोटको आवश्यकता हुनेछ ।