ट्रम्पका पक्षबाट महाभियोगको प्रतिनिधित्व गर्ने पाँचैजना वकिलको टिमले छाड्यो ट्रम्पलाई
प्रकाशित मिति : माघ १८, २०७७ आईतबार
सिनेटमा महाभियोगको सुनुवाई सुरु हुनुभन्दा अगाडि महाभियोगको प्रतिनिधित्व गर्ने पूर्व राष्ट्रपति डोनाल्ड ट्रम्पको सम्पूर्ण कानूनी समुहले ट्रम्पलाई छोडेको छ । ट्रम्पको प्रतिनिधित्व गर्ने अपेक्षा गरिएका सबै ५ जना वकिलहरुले ट्रम्पलाई छाडेका हुन् ।
साउथ क्यारोलिनाका वकिल बच बावेर्सको नेतृत्वको उक्त टिमले ट्रम्पको प्रतिरक्षा कसरी गर्ने भन्ने विषयमा विवाद भएपछि राजिनामा दिएको जनाइएको छ । ती वकिलहरुले पूर्व राष्ट्रपति भइसकेका ट्रम्पबिरुद्ध महाभियोगका लागि संवैधानिक आधारबारे तर्क गर्ने योजना बनाएका थिए ।
ट्रम्पले उक्त टिमलाई चुनावमा धाँधली भएकोबारे पनि तर्क गर्न भनेका थिए । तर वकिलहरु र ट्रम्पका केही सल्लाहकारहरुले राष्ट्रपतिका रुपमा पदमा नरहेको अवस्थामा महाभियोगका संवैधानिक आधारमा ध्यान केन्द्रीत गर्नुपर्ने बताएपछि विवाद भएको थियो । जसका कारण वकिलहरु राजिनामाको तहमा पुगेका छन् ।
सिनेटमा ४५ जना रिपब्लिकनहरुले पदमा नरहेका ट्रम्पलाई महाभियोग लगाउनु असंवैधानिक भएको पक्षमा मतदान गरिसकेका छन् । त्यसैले ट्रम्पबिरुद्धको महाभियोगको प्रस्ताव सिनेटबाट पारित हुने सम्भावना भने निकै कम रहेको छ ।
ट्रम्पबिरुद्धको महाभियोग प्रस्ताव गतसाता सिनेटमा पठाइसकिएको छ । प्रतिनिधिसभाका महाभियोग मेनेजरले महाभियोग प्रस्ताव सिनेटमा लगेका थिए ।
महाभियोगको मुद्दामा न्यायाधीशको रूपमा काम गर्ने सिनेटरहरुले गत मंगलबार शपथ लिइसकेका छन् । महाअभियोगबारेको ट्रायल सिनेटमा फेब्रुअरी ९ बाटमात्रै सुरु हुनेछ । जसबाट ९ जना प्रतिनिधिसभाका महाभियोग मेनेजर र ट्रम्पको प्रतिरक्षा टिमलाई कानुनी तयारीहरु गर्न समय दिइएको थियो ।
सिनेटमा हुने परीक्षणको अध्यक्षता पहिलोपटकको महाअभियोग प्रस्तावमा बेलामा जस्तो प्रधान न्यायाधिस जोन रोबोर्टसले नगर्ने भएका छन् । सिनेटका कार्यवाहक अध्यक्ष सिनेटर पेट्रिक लेहीले अध्यक्षता गर्ने जनाइएको छ ।
संविधान अनुशार यदि पदमा बहाल राष्ट्रपति बिरुद्धको प्रस्ताव भएमा प्रधानन्यायाधिसले र अन्य प्रस्तावका सन्दर्भमा सिनेटरले अध्यक्षता गर्ने व्यवस्था रहेको छ ।
बिद्रोहका लागि उत्तेजना फैलाएको आरोपमा ट्रम्पबिरुद्धको महाअभियोग प्रस्ताव अमेरिकी संसदको प्रतिनिधिसभाबाट पारित भएको थियो । जनवरी ६ मा क्यापिटल हिलमा भएको दंगाफसादमा ट्रम्पलाई हिंशा भड्काएको आरोप छ ।
ट्रम्पबिरुद्धको महाभियोग प्रस्ताव जनवरीको दोश्रो साता संसदको तल्लो सदन प्रतिनिधिसभाबाट पारित भएको थियो । महाभियोग प्रस्तावका पक्षमा २३२ र विपक्षमा १९७ मत खसेको थियो । ४ जना रिपब्लिकन मतदानमा सहभागी भएनन् ।
प्रस्तावबारे छलफलमा डेमोक्रेटिक सांसदहरुले ट्रम्प पक्षधर आक्रमणकारीहरु आतंकारीहरु भएको र उनीहरुलाई ट्रम्पबाट कट्टर बनाइएको बताएका थिए । अमेरिकामा मेक अमेरिका ग्रेट अगेन नामको गृहयुद्ध सुरु गर्न खोजिएको उनीहरुले आरोप लगाएका थिए ।
ट्रम्पबिरुद्ध उनको ४ बर्षे कार्यकालमा दोश्रोपटक महाभियोग प्रस्ताव ल्याइएको हो । दुईपटक नै महाभियोग प्रस्ताव प्रतिनिधिसभाबाट पारित भएको छ ।
महाभियोग पदमुक्त गर्ने प्रकृयामात्र नभएकाले ट्रम्पको पदावधी सकिएपछि पनि यसको प्रकृया अगाडि बढ्ने भएको छ । त्यस्तै महाभियोग सिनेटबाट पनि पारित भएमा ट्रम्पलाई अर्कोपटक चुनावमा उठ्न पनि स्वत पूर्णरुपमा प्रतिबन्ध भने नलाग्ने जनाइएको छ । यसबारे संविधानमा कुनै कुरा उल्लेख छैन । तर कसैलाई सार्वजनिक पद धारणबाट रोक लगाउनका लागि सामान्य बहुमतबाट निर्धारण गर्न सकिन्छ ।