भ्याक्सिनको दोश्रो डोज लिएको केही सातापछि अमेरिकी सांसद संक्रमित
प्रकाशित मिति : माघ १७, २०७७ शनिबार
कोरोनाबिरुद्धको फाइजर भ्याक्सिनको दोश्रो डोज लिएको केही सातापछि एकजना अमेरिकी सांसदमा कोरोना संक्रमण पुष्टी भएको छ । मासाचुसेट्सबाट अमेरिकी संसदको तल्लो सदन प्रतिनिधिसभामा प्रतिनिधित्व गर्ने डेमोक्रेटिक सांसद स्टेफेन लिन्चलाई कोरोना संक्रमण पुष्टी भएको हो ।
उनले जनवरीको सुरुतिर कोरोनाबिरुद्धको फाइजर भ्याक्सिनको दोश्रो डोज समेत लिएका थिए । उनलाई शुक्रबार गरिएको परीक्षणका क्रममा संक्रमण पुष्टी भएको उनको बोस्टनको कार्यालयका एकजना प्रवक्ताले बताएका छन् । राष्ट्रपति जो बाइडेनको सपथग्रहण समारोहमा उपस्थीत हुनु अगाडि भने उनको कोरोना परीक्षण नेगेटिभ नै रहेको जनाइएको छ ।
कोरोना संक्रमण पुष्टी भएपनि उनलाई कुनै लक्षण नदेखिएको र र उनको अवस्था सामान्य नै रहेको जनाइएको छ । उनी अब केहीदिन सेल्फ क्वारेन्टीनमा बस्ने भएका छन् भने संसदमा प्रोक्सी प्रकृयाबाट मतदान गर्ने भएका छन् ।
फाइजर भ्याक्सिन ९५ प्रतिशत प्रभावकारी र सुरक्षित रहेको निष्कर्ष रहेको छ । फाइजर भ्याक्सिन लक्षणयुक्त कोरोना संक्रमण रोक्नमा औषतमा ९५ प्रतिशत प्रभावकारी रहेको जनाइएको छ ।
भ्याक्सिनले इम्युनको कुन स्तर निर्माण गर्छ भन्ने अझै स्पष्ट छैन । भ्याक्सिन कतिलामोसमयसम्म प्रभावकारी हुन्छ भने निर्धारण गर्न स्वयंसेवकहरुलाई २ बर्षसम्म फ्लो गरिनेछ ।
फाइजर भ्याक्सिनलाई माइनस ९४ डिग्रि फरेनहाइट चिसो तापक्रममा राख्नुपर्छ । ६५ बर्षभन्दा माथिकाहरुमा यो भ्याक्सिन ९४ प्रतिशतभन्दा माथि प्रभावकारी रहेको छ । यो भ्याक्सिन तीनसाताको अन्तरमा दुई डोज लगाउनुपर्छ ।
यसैबीचमासाचुसेट्सकै अकी सांसद लोरी ट्राहनमा पनि कोरोना संक्रमण पुष्टी भएको छ । उनलाई पनि कुनै लक्षण देखिएको छैन भने सेल्फ क्वारेन्टीन सुरु गरेकी छिन् । उनले पनि संसदमा प्रोक्सी प्रकृयाबाटै मतदान गर्नेछिन् ।
कैयन सांसदहरुलाई जनवरीमा कोरोना संक्रमण पुष्टी भएको छ । जनवरी ६ मा भएको दंगाफसादका क्रममा मास्क लगाउन नमान्ने रिपब्लिकन सांसदहरुसँग मिसिएपछि कैयनलाई कोरोना संक्रमण पुष्टी भएको थियो ।