उच्च जोखिममा रहेकाहरुको कोरोना परीक्षण गर्न चीनमा ‘एनल स्वाब’ को प्रयोग सुरु
प्रकाशित मिति : माघ १४, २०७७ बुधबार
उच्च जोखिममा रहेकाहरुको कोरोना परीक्षण गर्न चीनले ‘एनल स्वाब’ अर्थात् मलद्घारबाट स्वाब लिन सुरु गरेको छ । सरकारी टेलिभिजन सीसीटिभीका अनुशार बेइजिङमा कोरोना संक्रमण पुष्टी भएका केही व्यक्तिको एनल स्वाब लिएर परीक्षण गरिएको थियो । यो विधिबाट स्वाब लिएर परीक्षण गर्दा संक्रमितहरु पहिचान दर अझ बढी हुने अपेक्षा गरिएको छ ।
अहिलेसम्म कोरोना परीक्षणका लागि नाक वा घाँटीबाट स्वाब संकलन गरिदै आएको छ । विश्वभर यहीं विधि प्रयोगमा रहेको बेलामा चीनले भने नयाँ बिधिको सुरुवात गरेको हो । बेइजिङको योयुन अस्पतालका बरिष्ठ डाक्टर लि तोङजेङले स्वासप्रश्वास प्रणालीको तुलनामा मलद्घारमा कोरोनाभाइरस लामो समय बस्ने बताएका छन् ।
एनल स्वाब लिंदा झण्डै २ इन्चको स्वाब प्रयोग गरिने जनाइएको छ । यो विधिबाट परीक्षण गर्दा झुठो पोजेटिभ रिपोर्ट आउने सम्भावना पनि निकै कम रहेको जनाइएको छ ।
तर सीसीटिभीले यो बिधि भने नाक र घाँटीबाट स्वाब संकलन गर्ने विधिजस्तै बृहत रुपमा भने प्रयोग नगरिने जनाएको छ । यो विधि त्यती सुविधाजनक नभएकाले पनि बृहत रुपमा प्रयोग गर्नमा भने समस्या रहेको छ । विश्वभर कोरोना संक्रमण दर उच्च रहँदा चीनले अन्तर्राष्ट्रिय आगमनमा कडा नियमहरु लगाइरहेको छ ।
देशभित्रै पनि कडा मापदण्डहरु लगाइएको छ । मध्य र उच्च जोखिमयुक्त क्षेत्रबाट बेइजिङ आवतजावत गर्नमा बिहिबारदेखि रोक लगाइदैछ । लुनार नयाँ बर्षमा कोरोना संक्रमण बढ्नसक्ने खतरालाई मध्यनजर गर्दै विभिन्न मापदण्डहरु अपनाइएको जनाइएको छ ।
चीन प्रवेशको स्वीकृति पाउनेहरुले पनि कोरोना नेगेटिभ भएका कैयन रिपोर्टहरु पेश गर्नुपर्नेछ । साथै तोकिएको होटलमा कम्तीमा १४ दिनसम्म क्वारेन्टीनमा बस्नुपर्ने नियम रहेको छ । कैयन सिटी र क्षेत्रमा अतिरिक्त घर अवलोकनका प्रावधानहरु समेत रहेका छन् ।