वासिंटन डिसीलाई ५१ औं राज्य बनाउन संसदमा बिल


प्रकाशित मिति : माघ १४, २०७७ बुधबार

वासिंटन डिसीलाई ५१ औं राज्य बनाउन डेमोक्रेटिक सांसदहरुले संसदमा बिल ल्याएका छन् । प्रतिनिधिसभा र सिनेटका डेमोक्र्याट्सहरुले बुधबार यो बिल ल्याएका हुन् । यो बिल प्रतिनिधसभाबाट पारित हुने सम्भावना रहेको छ तर सिनेटबाट पारित हुनमा भने आशंका रहेको छ ।

हाउस स्पीकर न्यान्सी पेलोसीले उक्त बिल मतदानका लागि फ्लोरमा ल्याउने प्रतिबद्धता जनाएकी छिन् । अन्य करदाता अमेरिकनलाई जस्तै वासिंटन डिसीका बासिन्दाहरुलाई पनि एउटै अधिकार प्रदान गर्न र ऐतिहासिक अन्याय सच्याउने सही समय आएको पेलोसीले बताएकी छिन् ।

सिनेटमा डेमोक्र्याटस र रिपब्लिकनको पचास पचास सिट रहेको र उपराष्ट्रपति कमला ह्यारिसले ट्राइब्रेक गर्न पाउने भएतापनि यो बिल पारित गर्नका लागि फिलिबस्टर ६० भोटको आवश्यकता पर्छ । त्यसका लागि १० जना रिपब्लिकनले फ्लोर क्रस गर्न आवश्यक हुन्छ ।

तर रिपब्लिकनहरुले वासिंटन डिसीलाई राज्यका रुपमा मान्यता दिलाउनेमा असहमति जनाउँदै आएका छन् । किनभने वासिंटन डिसीलाई राज्यको मान्यता दिएमा त्यहाँबाट प्रतिनिधित्व गर्ने सांसद डेमोक्रेटिक हुने सम्भावना उच्च रहेको छ ।

अमेरिकामा रहेका ५० वटा राज्यहरुभित्र वासिंटन डिसी पर्दैन । यदि वासिंटन डिसीले राज्यको मान्यता पाएमा अमेरिकामा ५१ वटा राज्य हुनेछन् । यदि वासिंटन डिसीलाई राज्यको मान्यता दिएको खण्डमा त्यहाँबाट प्रतिनिधिसभामा एकजना सांसदले मतदानको अधिकारसहित प्रतिनिधित्व जनाउन पाउनेछन् भने सिनेटका लागि वासिंटन डिसीले २ सिट पाउनेछ ।

 

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com