रिपब्लिकनले नमाने ५१ भोटबाटै बजेट प्रकृयामार्फत राहत चेकसहितको प्याकेज पारित गरिने
प्रकाशित मिति : माघ १३, २०७७ मंगलबार
रिपब्लिकनको सहायता विना नै बजेट प्रकृयाबाट राहत प्याकेज पारित गराउनेबारे डेमोक्रेटिक सांसदहरुबीच छलफल तीब्र बनाइएको छ । कैयन रिपब्लिकन सांसदहरु राहत प्याकेजको विपक्षमा देखिएपछि डेमोक्रेटिक सांसदहरु फिलिबस्टर ६० भोट विना नै बजेट प्रकृयाबाट प्याकेजका केही भागहरु पारित गराउने योजनामा लागेका हुन् ।
१४ सय डलरको राहत चेक, बेरोजगारी विमाका अतिरिक्त साप्ताहिक ४ सय डलर र चाइल्ड ट्याक्स क्रेडिट लगायतका प्रावधानहरु बजेट प्रकृयाबाट नै पारित गराउन सकिनेछ । त्यसका लागि सिनेटमा ५१ भोट भए पुग्नेछ । अहिले सिनेटमा ५० सिट डेमोक्र्याटसका रहेका छन् भने उपराष्ट्रपति कमला ह्यारिसले गर्ने टाइब्रेक मतका आधारमा डेमोक्र्याट्सले रिपब्लिकनको सहमति विना पनि ५१ भोट प्राप्त गर्नसक्नेछन् ।
तर ज्यालाबृद्धि लगायतका दीर्घकालिन नीतिगत प्रावधान भने बजेट प्रकृयाबाट पारित गर्न मिल्दैन । त्यसका लागि कम्तीमा १० जना रिपब्लिकन सिनेटरहरुको सहमति खोज्न जरुरी हुन्छ । त्यसैले राहत प्याकेजलाई टुक्राएर पारित गर्ने सन्दर्भमा पनि डेमोक्र्याट्सहरुले छलफल गरिरहेका छन् ।
संकटको समाधान गर्न टेबुलमा विभिन्न प्रकारका विकल्पहरु राखिएको र त्यसमा बजेट प्रकृयाको प्रयोग पनि एउटा रहेको सिनेटमा डेमोक्रेटिक नेता चक शुमरले बताएका छन् । दुईलीय सहमति कायम हुन नसके डेमोक्र्याट्सहरुले छिटोमा सोमबार बजेट प्रस्ताव ल्याएर ५१ भोटबाट प्याकेज पारित गराउन मेलमिलापको प्रकृया सुरुवात गर्ने जनाइएको छ ।
अहिलेका लागि भने बाइडेन प्रशासनले दुईदलीय सहमतिमा नै जोड दिएको छ । बार्ता र छलफल कसरी अगाडि बढ्छ भन्ने आधारमा बजेट प्रकृयाको प्रयोग गर्नेबारे निर्णय हुने राष्ट्रपति जो बाइडेनले बताएका छन् ।
सिनेटमा शक्तिशाली बजेट कमिटिका प्रमुख हुने सिनेटर बर्नी स्याण्डर्सले भने बजेट मेलमिलापको प्रकृया नै उचित विकल्प भएको बताएको छन् । १ दशमलव ९ ट्रिलियनको राहत प्याकेजमा बेरोजगारी विमा रकममा बढोत्तरी, १४ सय डलरको राहत चेक लगायतका कैयन राहतका विषयहरु समेटिएका छन् । आफू रिपब्लिकनहरुसँग काम गर्न इच्छुक रहेपनि राहतका लागि हप्तौं कुर्न नसकिने स्याण्डर्सको भनाई छ ।
केही मुख्य रिपब्लिकन सांसदहरुले भने १४ सय डलरको राहत चेकसहितको प्याकेज पारित हुन महिनौं लाग्नसक्ने बताएका छन् ।
सबैभन्दा उदार मध्येकी एक रिपब्लिकन सिनेटर सुजन कोलिन्सले आफूले भ्याक्सिन फण्ड बढाउनुपर्नेमा सहानुभूति राख्ने भएपनि यति ठूलो प्याकेज आवश्यक नभएको बताएकी छिन् । भर्खरै ९ सय बिलियनको राहत प्याकेज पारित भएको अवस्थामा तत्कालै ठूलो प्याकेज पारित गर्न आवश्यक नभएको र त्यसका लागि केही महिना लाग्नसक्ने बताएकी छिन् ।
त्यस्तै उदार मानिने रिपब्लिकन सिनेटर लिसा मुर्कोस्कीले बाइडेनको आव्हान महत्वपूर्ण भएको बताएपनि ९ सय बिलियनको राहत प्याकेजको मसी सुक्न नपाएको बताएकी छिन् । उनले उचित रकमको राहत प्याकेज आवश्यक हुने बताएकी छिन् ।
त्यस्तै रुढीबादी र पार्टीलाइन विपरित अगाडि बढ्ने रिपब्लिकन सिनेटर मिट रोम्नीले अर्को एक ट्रिलियन वा ५ सय बिलियनको विशाल राहत प्याकेज तत्काल चाहिने पक्षमा आफू नरहेको बताएका छन् । अर्थतन्त्र कोरोनाका कारण पछाडि परेको तर राहत नदिएका कारण पछाडि नपरेको बताएका छन् । सबैले भ्याक्सिन लगाएपछि अर्थतन्त्र सुदृढ हुने उनले बताए ।