नयाँ देश थपेर कोरोना सम्बन्धित यात्रा प्रतिबन्ध लागु गराउने आदेश जारी गर्दै बाइडेन
प्रकाशित मिति : माघ ११, २०७७ आईतबार
राष्ट्रपतिको पदावधि सकिन २ दिनभन्दा पनि कम समय बाँकी रहँदा डोनाल्ड ट्रम्पले जनवरी २६ देखि लागु हुने गरी हटाउने घोषणा गरेको कोरोना महामारी सम्बन्धित यात्रा प्रतिबन्ध राष्ट्रपति जो बाइडेनले पुन: कायम गर्ने भएका छन् । बाइडेनले यात्रा प्रतिबन्धको सुचीमा दक्षिण अफ्रिकालाई पनि थप्ने गरी सोमबार कार्यकारी आदेश जारी गर्ने भएका छन् ।
युरोपका शेंगेन क्षेत्रका २६ देशहरु, यूके, आयरल्याण्ड, ब्राजिलबाट अमेरिका आउनमा रोक लगाइदै आएकोमा बाइडेनले त्यसमा दक्षिण अफ्रिका पनि थप्ने भएका छन् । ट्रम्पले कार्यकारी आदेशमार्फत शेंगेन क्षेत्रका २६ देशहरुसहित यूके, आयरल्याण्ड, ब्राजिलमाथिको यात्रा प्रतिबन्ध हटाउने घोषणा गरेका थिए तर चीन र इरानमाथिको यात्रा प्रतिबन्ध भने कायमै राख्ने घोषणा गरेका थिए ।
ट्रम्पले जारी गरेको कार्यकारी आदेश जो बाइडेनले पदभार ग्रहण गरेको ६ दिनपछि अर्थात जनवरी २६ पछिमात्र लागु हुने तय भएकोमा बाइडेनले त्यसलाई जनवरी २५ सोमबार नै खारेज गरिदिने भएका छन् । अर्थात् युरोपका २६ देशहरु यूके, आयरल्याण्ड, ब्राजिल, चीन र इरानबाट नागरिक र ग्रिनकार्डवाहकसहित छुट दिइएका व्यक्तिबाहेक अरुलाई अमेरिका आउनमा लगाइएको रोक कायम नै रहनेछ । त्यसमा दक्षिण अफ्रिका पनि थपिनेछ ।
कोरोनाको नयाँ प्रकार विश्वमा बढीरहेको सन्दर्भमा र महामारी खराब बन्दै गएको अवस्थामा अन्तर्राष्ट्रिय यात्रा प्रतिबन्धहरु हटाउने उचित समय नभएको बाइडेन प्रशासनको ठहर रहेको छ । अमेरिका आउने हरेक यात्रुको नेगेटिभ कोरोना रिपोर्ट अनिवार्य हुनुपर्ने मापदण्ड कार्यान्वयनमा आइसकेको छ । कोरोनाको महामारी फैलिनबाट रोक्न उडानमार्फत अमेरिका आउने हरेक यात्रुले प्रस्थानको तीनदिनभित्रको नेगेटिभ कोरोना रिपोर्ट बुझाउनु पर्ने मापदण्ड रहेको छ ।
ट्रम्पले गत मे २४ मा कार्यकारी आदेश जारी गरेर बेलायत, ब्राजिल, आयरल्याण्ड, २६ वटा युरोपेली देशहरु, इरान र चीनमाथि यात्रा प्रतिबन्धको घोषणा गरेका थिए । यो आदेश ट्रम्पले आप्रवासनमा लगाएको रोकभन्दा फरक आदेश हो । ट्रम्पले कोरोनाको महामारीको कारण देखाउदै कामदार भिसा र विभिन्न प्रकारका ग्रिनकार्डमा लगाएको रोक भने मार्चको अन्तिम सम्म नै कायम छ ।