९ डोज भ्याक्सिन चोरेर पत्नी र साथीलाई दिने टेक्सासका डाक्टर फन्दामा, जेलसजाय हुनसक्ने
प्रकाशित मिति : माघ ११, २०७७ आईतबार
भ्याक्सिन चोरेर परिवार र साथीहरुलाई दिएको अभियोगमा टेक्सासका एकजना डाक्टर फन्दामा परेका छन् । टेक्सासको ह्युस्टन क्षेत्रमा डाक्टर हसन गोकालले ९ डोज भ्याक्सिन चोरेर परिवार र साथीहरुलाई दिएको अभियोग लगाएको छ ।
यदि अभियोग प्रमाणित भएमा उनलाई १ बर्षसम्म जेलसजाय र ४ हजार डलरसम्म जरिवाना हुनसक्ने जनाइएको छ । ह्यारिस काउन्टी पब्लिक हेल्थमा कार्यरत ती डाक्टरले मोडेर्ना भ्याक्सिनका शीशी चोरेर श्रीमतिसहित परिवारका सदस्य र साथीहरु गरी ९ जनालाई भ्याक्सिन लगाइदिएको जनाइएको छ ।
उनले मोडेर्ना भ्याक्सिनका पंचर भएका शीशीहरु चोरेर बाँडेको अभियोग छ । सरकारी प्रकृयाबाट भ्याक्सिन पाउनेहरुको पालो मिचेर ती डाक्टरले पदको दुरुपयोग गरी आफ्ना परिवार र साथीहरुलाई भ्याक्सिन दिएको ह्यारिस काउन्टीका डिस्ट्रिक्ट एटोर्नी किम ओगले आरोप लगाएका छन् ।
डाक्टरका वकिलले भने पंचर भएर खेर जान लागेका भ्याक्सिन खेर जानुको साटो मान्छेको पाखुरामा लगाइएकाले ती डाक्टर इमान्दार कर्मचारी भएको बताएका छन् । ह्यारिस काउन्टीले भ्याक्सिन खेर जान दिने र डाक्टरलाई बदनाम गर्ने प्रयासमात्र गरेको डाक्टरका वकिलको भनाई छ ।
डाक्टर गोकाललाई अनुसन्धानका क्रममा कामबाट निष्काशन गरिसकिएको छ । अधिकारीहरुले पंचर भएका शीशीहरु परिवार र आफन्तलाई दिने नभई मुख्य अफिसमा ल्याएर पालोमा रहेकाहरुलाई दिनुपर्ने बताएका छन् ।