न्युयोर्कमा कोरोनाबिरुद्धको भ्याक्सिन सकिएपछि तय गरिएका अप्वाइन्टमेन्टहरु रद्द
प्रकाशित मिति : माघ १०, २०७७ शनिबार
न्युयोर्क सिटी र न्युयोर्क राज्यमा पठाइएका कोरोनाबिरुद्धको भ्याक्सिन सकिएपछि तय गरिएका कैयन अप्वाइन्टहरु रद्द गरिएका छन् । आगामी साता भ्याक्सिनका नयाँ सिपमेन्ट नआउँदासम्म सबै भ्याक्सिन पूर्णरुपमा सकिएको जनाइएको छ ।
भ्याक्सिन सकिएपछि अस्पतालहरुले नयाँ अप्वाइन्टमेन्ट लिएका छैनन् भने पहिलेका अप्वाइन्टमेन्टपनि रद्द गरेका छन् । १५ वटा भ्याक्सिन वितरण केन्द्रहरु बन्द गरिएका छन् ।
गभर्नर एन्ड्रयु कुमोले यसको दोष पूर्व ट्रम्प प्रशासनलाई दिएका छन् । ट्रम्प प्रशासनले आपूर्ति नबढाइकनै योग्यताका धेरै श्रेणी खुला गरेकाले यस्तो अवस्था श्रृजना भएको उनले आरोप लगाएका छन् ।
आगामी साता साढे २ लाख डोज भ्याक्सिन आउनेछ । तर यी भ्याक्सिनका डोजहरु हात्तिका मुखमा जिरा जस्तै हुनेछ । कतिपयले भण्डारण गरिएका दोश्रो डोजहरु नै पहिलो पटक भ्याक्सिन लगाउनेहरुका लागि प्रयोग गर्न सुझाव दिएका छन् ।
गभर्नर कुमोले संघीय सरकारसँग समन्वयविना यसो गर्न नसकिने बताएका छन् । समयमै दोश्रो डोज दिन नसकेको खण्डमा भ्याक्सिनको प्रभावकारिताबारे प्रश्नचिन्ह खडा हुने स्वास्थ्यविज्ञहरुले बताएका छन् ।
न्युयोर्कमा अहिलेसम्म १२ लाख बढी भ्याक्सिनका डोजहरु प्रदान गरिसकिएको सीडीसीले जनाएको छ । जसमध्ये कम्तीमा एउटामात्र डोज पाउनेहरु १० लाख रहेका छन् । न्युयोर्कमा साढे २३ लाख भ्याक्सिनका डोज डेलिभर गरिसकिएको छ ।
आगामी ६ हप्ताका लागि प्रत्येक हप्ता साढे २ लाखका दरले भ्याक्सिनका डोजहरु न्युयोर्कमा डेलिभर गरिदैछ । तर राज्यले हरेक दिन एकलाखलाई सहजै भ्याक्सिन लगाउनसक्ने र साताका लागि उपलब्ध गराइने साढे २ लाख प्रयाप्त नहुने गभर्नर कुमोको भनाई छ ।
सीडीसीका अनुशार अमेरिकाभर अहिलेसम्म झण्डै ४ करोड भ्याक्सिनका डोजहरु डेलिभर गरिएको छ । त्यसमध्ये झण्डै दुई करोड डोज भ्याक्सिन लगाइसकिएको छ । १ करोड ६२ लाख बढीले एउटा डोज र झण्डै २८ लाखले दुईवटै डोज भ्याक्सिन प्राप्त गरिसकेका छन् ।