तीन डेमोक्रेटिक सिनेटरहरुबाट सपथग्रहण, अब सिनेटमा डेमोक्र्याट्सको बहुमत
प्रकाशित मिति : माघ ७, २०७७ बुधबार
जर्जियाबाट सिनेटका दुबैसिटमा विजयी डेमोक्र्याट्स जोन ओसोफ र राफल वार्नकले पद तथा गोपनियताको सपथग्रहण गरेका छन् । साथै ह्यारिसको सिनेटमा कार्यकालको बाँकी २ बर्ष सम्हाल्ने एलेक्स प्याडिलियाले पनि सिनेटरका रुपमा सपथग्रहण गरेका छन् ।
सिनेटको अध्यक्षका हैसियतमा उपराष्ट्रपति कमला ह्यारिसले सपथग्रहण गराएकी हुन् । अब सिनेटमा औपचारिक रुपमा डेमोक्र्याट्सहरुको नियन्त्रण कायम भएको छ । सिनेटका एकसयसिटमा ५० सिट रिपब्लिकनले र ५० सिट डेमोक्र्याट्सले जीतेका कारण उपराष्ट्रपतिको टाइब्रेक मतका आधारमा डेमोक्र्याट्सको नियन्त्रण कायम भएको हो ।
नजिता प्रमाणिकरण गर्ने डेडलाइन शुक्रबारसम्म रहेपनि मंगलबार नै प्रमाणिकरण गरिएपछि आजै दुबैजनालाई उपराष्ट्रपति कमला ह्यारिसबाट सपथ ग्रहण गर्ने मौका मिलेको हो ।
३३ बर्षका डेमोक्रेटिक उम्मेदबार जोन ओसोफले रिपब्लिकन उम्मेदबार डेभिड पर्डयुलाई पराजित गरेका हुन् । त्यस्तै राफल वार्नकले रिपब्लिकन उम्मेदबार केली लोफ्लरलाई पराजित गरेका थिए ।
ओसोफले झण्डै २४ हजार मतको अन्तरले जीतेका थिए भने वार्नकले झण्डै ६२ हजार मतले जीतेका थिए । वार्नकले सन् २०२२ को चुनावमा पुन प्रतिस्पर्धा गर्नुपर्नेछ भने ओसोफ पूरै ६ बर्ष सिनेटमा रहनेछन् ।
३३ बर्षका ओसोफ सन् १९८१ पछि अमेरिकी सिनेटरमा चुनाव जित्ने सबैभन्दा कान्छा व्यक्ति हुन् । जर्जियाबाट सन् २००४ यता सिनेटमा दुबै सदस्य रिपब्लिकनहरु रहदै आएका थिए । जर्जियामा राष्ट्रपति चुनावमा सन् १९९६ देखि रिपब्लिकनले जित्दै आएकोमा यसपटक डेमोक्रेटिक उम्मेदबार जो बाइडेनले जीतेका थिए ।
अमेरिकी राष्ट्रपति जो बाइडेन सन् १९७३ मा सिनेटरमा निर्वाचित हुँदा ३० बर्षका थिए । त्यो यता उनीभन्दा कम उमेरका कोही पनि व्यक्ति सिनेटरमा निर्वाचित भएका छैनन् ।