जर्जियाबाट सिनेटका दुबैसिटमा विजयी डेमोक्रेटिक उम्मेदबारको जीत प्रमाणिकरण, भोलि नै सपथ
प्रकाशित मिति : माघ ६, २०७७ मंगलबार
❒ जर्जियाबाट सिनेटका दुबैसिटमा विजयी डेमोक्रेटिक उम्मेदबारको जीत औपचारिक रुपमा प्रमाणिकरण, भोलि नै सपथग्रहण
❒ राष्ट्रपतिमा निर्वाचित जो बाइडेनले सपथ लिनु अगाडि नै ओसोफ र वार्नकको जीत प्रमाणिकरण गरिएकाले दुबैजनालाई बुधबार उपराष्ट्रपति कमला ह्यारिसले सपथग्रहण गरेपछि सिनेटरका रुपमा सपथ लिनका लागि बाटो खुल्ला
❒ जर्जियाका दुई डेमोक्र्याटसको जीत बाइडेन कार्यकालमा अमेरिकाको आप्रवासन लगायतको परिदृश्य नै बदल्न सक्ने जीत
❒ खसोखासमा थप समाचारहरुका लागि यहाँ क्लीक गर्नुहोला ।
जर्जियाले सिनेटका दुबैसिटमा विजयी डेमोक्रेटिक उम्मेदबारको जीत औपचारिक रुपमा प्रमाणिकरण गरेको छ । जर्जियाका सेक्रेटरी अफ स्टेटले आज औपचारिक रुपमा जोन ओसोफ र राफल वार्नकको जीत प्रमाणिकरण गरेका हुन् ।
नजिता प्रमाणिकरण गर्ने डेडलाइन शुक्रबारसम्म रहेपनि मंगलबार नै प्रमाणिकरण गरिएको हो । अमेरिकी राष्ट्रपतिमा निर्वाचित जो बाइडेनले सपथ लिनु अगाडि नै ओसोफ र वार्नकको जीत प्रमाणिकरण गरिएको छ । अब दुबैजनालाई बुधबार उपराष्ट्रपति कमला ह्यारिसले सपथग्रहण गरेपछि सिनेटरका रुपमा सपथ लिनका लागि बाटो खुलेको छ ।
उनीहरुले भोलि दिउसो साढे ४ बजेतिर सपथग्रहण गर्ने जनाइएको छ । त्यसपछि सिनेटमा डेमोक्र्याट्सको नियन्त्रण कायम हुनेछ । सिनेटका एकसयसिटमा ५० सिट रिपब्लिकनले र ५० सिट डेमोक्र्याट्सले जीतेका कारण उपराष्ट्रपतिको टाइब्रेक मतका आधारमा डेमोक्र्याट्सको नियन्त्रण कायम हुने भएको हो ।
३३ बर्षका डेमोक्रेटिक उम्मेदबार जोन ओसोफले रिपब्लिकन उम्मेदबार डेभिड पर्डयुलाई पराजित गरेका हुन् । त्यस्तै राफल वार्नकले रिपब्लिकन उम्मेदबार केली लोफ्लरलाई पराजित गरेका थिए ।
ओसोफले झण्डै २४ हजार मतको अन्तरले जीतेका थिए भने वार्नकले झण्डै ६२ हजार मतले जीतेका थिए । वार्नकले सन् २०२२ को चुनावमा पुन प्रतिस्पर्धा गर्नुपर्नेछ भने ओसोफ पूरै ६ बर्ष सिनेटमा रहनेछन् ।
३३ बर्षका ओसोफ सन् १९८१ पछि अमेरिकी सिनेटरमा चुनाव जित्ने सबैभन्दा कान्छा व्यक्ति हुन् । जर्जियाबाट सन् २००४ यता सिनेटमा दुबै सदस्य रिपब्लिकनहरु रहदै आएका थिए । जर्जियामा राष्ट्रपति चुनावमा सन् १९९६ देखि रिपब्लिकनले जित्दै आएकोमा यसपटक डेमोक्रेटिक उम्मेदबार जो बाइडेनले जीतेका थिए ।