कोरोनाको डरले तीनमहिनादेखि शिकागोको एयरपोर्टभित्र लुकेर बसेका आदित्य पक्राउ
प्रकाशित मिति : माघ ५, २०७७ सोमबार
❒ कोरोनाको महामारीका कारण घरमा जान डराएर तीन महिनादेखि शिकागोको अन्तर्राष्ट्रिय विमानस्थलभित्र लुकेर बसेका ३६ बर्षका आदित्य सिंह पक्राउ
❒ एकजना अपरेशन म्यानेजरको गत अक्टोबरमा हराएको परिचयपत्र बोकेर उनी अनाधिकृत रुपमा एपरपोर्टको सुरक्षित र निषेधित क्षेत्रमा बसेको पुष्टी
❒ १९ अक्टोबर २०२० देखि १६ जनवरी २०२१ सम्म विमानस्थलभित्र लुकेर बस्दै आएका उनलाई विमास्थलको निषेधित क्षेत्रमा छिरेको र चोरीमा संलग्न भएको अभियोग
❒ खसोखासमा थप समाचारहरुका लागि यहाँ क्लीक गर्नुहोला ।
कोरोनाको महामारीका कारण घरमा जान डराएर तीन महिनादेखि शिकागोको अन्तर्राष्ट्रिय विमानस्थलभित्र लुकेर बसेका एक युवा पक्राउ परेका छन् । शिकागोको अन्तर्राष्ट्रिय विमानस्थलभित्रको सुरक्षित क्षेत्रमा लुकिछिपी बस्दै आएका ३६ बर्षका आदित्य सिंहलाई शनिबार पक्राउ गरिएको जनाइएको छ ।
एयरलाइन्सका कर्मचारीहरुले उनलाई परिचयपत्र देखाउन भनेपछि उनी त्यहाँ अनाधिकृत रुपमा बसेको पत्ता लागेको थियो । आदित्यले आफ्नो मास्क हटाएर एकजना अपरेशन म्यानेजरको गत अक्टोबरमा हराएको परिचयपत्र देखाएपछि उनी अनाधिकृत रुपमा बसेको थाहा भएको हो । ती अपरेशन म्यानेजरले आफ्नो परिचय पत्र हराएकोबारे सम्बन्धित निकायमा रिपोर्ट गरिसकेका थिए ।
आदित्य लस एन्जलसबाट उडानमार्फत १९ अक्टोबरमा शिकागोको ओहेयर अन्तर्राष्ट्रिय विमानस्थलमा अवतरण गरेका थिए । त्यसपछि उनी कहिलेपनि विमानस्थलबाट बाहिर निस्केनन् । उनले त्यही एकजना कर्मचारीको परिचयपत्र भेट्टाएका थिए । उनले कोरोनाको कारण घरमा जान डर लागेकाले विमानस्थलमा नै बस्दै आएको बताएका छन् ।
उनले अन्य यात्रुहरुले दिएको खानेकुरा खाएर बाँचेको बताएका छन् । कुक काउन्टीका न्यायाधिसले यो मुद्दाको अवस्थाबारे आश्चर्य व्यक्त गरेकी थिइन् । उनले अदालतमा अभियोजनकर्तालाई भनिन् – ‘त्यसोभए तपाई भन्दै हुनुहुन्छ कि एकजना अनाधिकृत गैर कर्मचारी विमानस्थलको सुरक्षित भागमा १९ अक्टोबर २०२० देखि १६ जनवरी २०२१ सम्म बस्दै आएका थिए । तर उनी पत्ता लागेका थिएनन् ?’
आदित्य लस एन्जलसमा बस्दै आएको र उनको कुनै विगतको आपराधिक रेकर्ड नभएको पत्ता लागेको छ । उनी किन शिकागो आए भन्नेबारे भने केही खुलेको छैन । उनलाई विमास्थलको निषेधित क्षेत्रमा छिरेको र चोरीमा संलग्न भएको अभियोग लगाइएको छ ।
उनलाई एकहजार डलर जमानत तोकिएको छ । उनी उक्त रकम सहित आएको खण्डमा विमानस्थलमा जान निषेध गरिने न्यायाधिसको भनाई छ । अदालतमा उनलाई अर्कोपटक जनवरी २७ मा पेश गरिनेछ । यो अवस्था र तथ्य अत्यन्तै स्तब्ध बनाउने खालको रहेको न्यायाधिसको भनाई छ ।
शिकागोको उड्ययन विभागले घटनाबारे अनुसन्धान भइरहेको जनाएको छ । तर आदित्य सिंह विमानस्थल र यात्रा गर्ने सर्वसाधारणहरुका लागि सुरक्षा जोखिम भने नभएको जनाएको छ । आदित्य सिंह भारतीय मुलका भएको जनाइएको छ ।