बाइडेनको सपथग्रहण समारोह ‘रिहर्सल’ मा भागदौड
प्रकाशित मिति : माघ ५, २०७७ सोमबार
नवनिर्वाचित अमेरिकी राष्ट्रपति जो बाइडेनको सपथग्रहण समारोहको रिहर्सल गरिरहेका सहभागीबीच भागदौड मच्चिएको छ । नजिकैको भवनमा आगो लागेपछि क्यापिटल हिलको पश्चिमतिरको अग्रभागबाट रिहर्शलमा सहभागीहरुलाई निकालेर सुरक्षित स्थानमा लगिएको छ ।
विहान साढे १० बजेतिर नजिकै धुँवाको मुस्लो देखिएपछि रिहर्सलमा सहभागी सैन्य ब्याण्डका सदस्यहरुसहित अन्य सहभागीहरुलाई सुरक्षा अधिकारीहरुले तत्कालै सुरक्षित स्थानमा लगेका थिए । जनवरी ६ को दंगाफसादपछि उक्त क्षेत्रमा सुरक्षा व्यवस्था निकै कडा बनाइएको छ । तर कुनै हिंशात्मक घटना हुनसक्ने सम्भावनालाई सचेतताका साथ हेरिएको छ ।
आगलागी समारोहको अभ्याससँग सम्बन्धित भने नभएको पुष्टी भएको छ । वासिंटन डिसीको फायर डिपार्टमेन्टले घटनामा कोही पनि घाइते नभएको बताएको छ । आगलागी होमलेस शिविरमा भएको जनाइको छ, जुन क्यापिटल हिल भन्दा ५ ब्लक पर रहेको छ ।
रिहर्सल भइरहेको स्थानमा नवनिर्वाचित राष्ट्रपति जो बाइडेन र उपराष्ट्रपति कमला ह्यारिस भने थिएनन् । आगलागीको कारण पनि खुलेको छैन ।
नवनिर्वाचित राष्ट्रपति बाइडेनको सपथग्रहण र त्यसको सेरोफेरोमा सबै ५० वटा राज्य र वासिंटन डिसीमा सशस्त्र प्रदर्शन हुनसक्ने भन्दै उच्च सुरक्षा शतर्कता अपनाइएको छ ।
देशभरबाट वासिंटन डिसीमा सेना पठाइएको छ भने सबै ५० राज्यका राज्य संसदमा हुलदंगा हुनसक्ने भन्दै एफबीआईले चेतावनी दिएको छ । वासिंटन डिसीको क्यापिटल हिल नजिकैको नेशनल मल बन्द गरिएको छ । सुरक्षा व्यवस्था कडा बनाउनका लागि सडकहरुमा अवरोधहरु बनाइएको छ भने ठाउँ ठाउँमा प्लाइउडहरु ठोकिएको छ ।
भर्जिनियाका सांसद डन बेयरले खतरा बास्तविक रहेको भन्दै क्यापिटल हिल क्षेत्रमा नजान प्रेरित गरेका छन् । बाइडेनको समुहले सपथग्रहण समारोहका लागि वासिंटन डिसीमा यात्रा नगर्न सर्वसाधारणहरुलाई अपिल गरिसकेको छ ।
कोरोनाको महामारीको कारण देखाउँदै वासिंटन डिसी नआउन सुझाव दिइएको हो । स्थानीय अधिकारीहरुले सपथग्रहण समारोह भर्चुअल तरिकाले हेर्न प्रोत्साहित गरेका छन् ।
मेरिल्याण्ड, युटाह र न्यु मेक्सिकोका गभर्नरहरुले राज्यमा संकटकालको घोषणा गरेका छन् । वासिंटन डिसीमा पनि संकटकालको घोषणा गरिएको छ । क्यालिफोर्निया, पेन्सिलभेनिया, मिसिगन, भर्जिनिया, वासिंटन र विसकन्सिनमा सेनाहरु सकृय बनाइएको छ । टेक्सासले शनिबारदेखि राज्यको संसद बन्दको घोषणा गरेको छ ।