सबै ५० वटा राज्य र वासिंटन डिसीमा सशस्त्र प्रदर्शन हुनसक्ने भन्दै ‘हाई अलर्ट’


प्रकाशित मिति : माघ ३, २०७७ शनिबार

❒ अमेरिकामा नवनिर्वाचित राष्ट्रपति जो बाइडेनको सपथग्रहण र त्यसको सेरोफेरोमा सबै ५० वटा राज्य र वासिंटन डिसीमा सशस्त्र प्रदर्शन हुनसक्ने भन्दै उच्च सुरक्षा शतर्कता

❒ संसद भवन परिसरमा क्यापिटल हिल प्रहरीको चेकप्वाइन्ट पार गर्न प्रयास गर्ने एकजना व्यक्ति ५०९ राउण्ड अवैध गोली र दुईवटा बन्दुकसहित पक्राउ

❒ मेरिल्याण्ड, युटाह र न्यु मेक्सिकोका गभर्नरहरुले राज्यमा संकटकालको घोषणा, क्यालिफोर्निया, पेन्सिलभेनिया, मिसिगन, भर्जिनिया, वासिंटन र विसकन्सिनमा सेना सकृय

❒ खसोखासमा थप समाचारहरुका लागि यहाँ क्लीक गर्नुहोला ।

 

अमेरिकामा नवनिर्वाचित राष्ट्रपति जो बाइडेनको सपथग्रहण र त्यसको सेरोफेरोमा सबै ५० वटा राज्य र वासिंटन डिसीमा सशस्त्र प्रदर्शन हुनसक्ने भन्दै उच्च सुरक्षा शतर्कता अपनाइएको छ । यो सप्ताहन्तमा हुनसक्ने हिंशात्मक प्रदर्शनलाई रोक्न उच्च सुरक्षा शतर्कता अपनाइएको हो ।

देशभरबाट वासिंटन डिसीमा सेना पठाइएको छ भने सबै ५० राज्यका राज्य संसदमा हुलदंगा हुनसक्ने भन्दै एफबीआईले चेतावनी दिएको छ । वासिंटन डिसीको नेशनल मल बन्द गरिएको छ । सुरक्षा व्यवस्था कडा बनाउनका लागि सडकहरुमा अवरोधहरु बनाइएको छ भने ठाउँ ठाउँमा प्लाइउडहरु ठोकिएको छ ।

संसद भवन परिसरमा क्यापिटल हिल प्रहरीको चेकप्वाइन्ट पार गर्न प्रयास गर्ने एकजना व्यक्तिलाई हतियारसहित पक्राउ गरिएको छ । भर्जिनिया निवासी ती व्यक्तिलाई ५०९ राउण्ड अवैध गोली र दुईवटा बन्दुकसहित पक्राउ गरिएको हो ।

भर्जिनियाका सांसद डन बेयरले खतरा बास्तविक रहेको भन्दै क्यापिटल हिल क्षेत्रमा नजान प्रेरित गरेका छन् । बाइडेनको समुहले सपथग्रहण समारोहका लागि वासिंटन डिसीमा यात्रा नगर्न सर्वसाधारणहरुलाई अपिल गरिसकेको छ ।

कोरोनाको महामारीको कारण देखाउँदै वासिंटन डिसी नआउन सुझाव दिइएको हो । स्थानीय अधिकारीहरुले सपथग्रहण समारोह भर्चुअल तरिकाले हेर्न प्रोत्साहित गरेका छन् ।

वासिंटन डिसी क्षेत्रमा आइतबार प्रदर्शन हुनसक्ने अनुमान गरिएको छ । ट्रम्पका समर्थकहरु र अति दक्षिणपन्थी अनलाइन नेटवर्कले जनवरी १७ मा वासिंटन डिसीमा सशस्त्र प्रदर्शनको आव्हान गरेको छ । त्यस्तै सपथग्रहण समारोहका दिनमा पनि उनीहरुले प्रदर्शनको आव्हान गरेका छन् ।

केही मिलिसियाहरुले भने प्रदर्शनमा सहभागी नहुन आव्हान गरेका छन् । प्रहरीको पासोमा पर्नसक्ने भन्दै उनीहरुले प्रदर्शनमा सहभागी नहुन आव्हान गरिएको हो ।

यसैबीच मेरिल्याण्ड, युटाह र न्यु मेक्सिकोका गभर्नरहरुले राज्यमा संकटकालको घोषणा गरेका छन् । वासिंटन डिसीमा पनि संकटकालको घोषणा गरिएको छ । क्यालिफोर्निया, पेन्सिलभेनिया, मिसिगन, भर्जिनिया, वासिंटन र विसकन्सिनमा सेनाहरु सकृय बनाइएको छ । टेक्सासले शनिबारदेखि राज्यको संसद बन्दको घोषणा गरेको छ ।

 

 

© 2024 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com