ट्रम्पले बाइडेनको सपथग्रहणभन्दा केही घण्टा अगाडि नै ह्वाइटहाउस छाड्ने
प्रकाशित मिति : माघ २, २०७७ शुक्रबार
❒ ट्रम्पले बाइडेनको सपथग्रहण भन्दा केही घण्टा अगाडि नै ह्वाइटहाउस छाड्ने, मेरिल्याण्डमा रहेको सैन्य क्याम्पमा केहीबेर रोकिएर कमाण्डर इन चिफका रुपमा अन्तिम सम्बोधन गर्ने
❒ नव निर्वाचित राष्ट्रपतिको सपथमा सहभागी नहुने ट्रम्पमात्र पहिलो राष्ट्रपति भने होइनन्, जोन आडम्स, जोन क्वीन्सी आडम्स र एन्ड्रयु जोन्सन पनि नव निर्वाचित राष्ट्रपतिको सपथमा सहभागी भएका थिएनन् ।
❒ जनवरी २० मा वासिंटन डिसीमा खट्ने सेनाको संख्या इराक, अफगानिस्तान र सिरियामा रहेका कुल अमेरिकी सेनाको भन्दा बढी
❒ खसोखासमा थप समाचारहरुका लागि यहाँ क्लीक गर्नुहोला ।
डोनाल्ड ट्रम्पले नव निर्वाचित अमेरिकी राष्ट्रपति जो बाइडेनले सपथग्रहण गर्नुभन्दा केही घण्टा अगाडि नै ह्वाइटहाउस छाड्ने भएका छन् । ह्वाइटहाउसबाट ट्रम्प मेरिल्याण्डमा रहेको सैन्य क्याम्पमा केहीबेर रोकिएर कमाण्डर इन चिफका रुपमा अन्तिम सम्बोधन गर्ने जनाइएको छ । त्यहाँ उनका लागि बिदाई समारोह राखिनेछ ।
त्यसपछि एयर फोर्स वानमा चढेर ट्रम्प फ्लोरिडामा रहेको आफ्नो निजी रिसोर्ट मार ए लागो जाने जनाइएको छ । न्युयोर्कबाट फ्लोरिडामा बसाई सराई गरिसकेका उनले त्यहाँ रहँदा आफ्ना ह्वाइटहाउसका केही सहयोगीहरुलाई पनि व्यक्तिगत कर्मचारीका रुपमा सँगै राख्ने जनाइएको छ । ट्रम्पले बाइडेनको सपथग्रहण समारोहमा सहभागी नहुने बताइसकेका छन् ।
नव निर्वाचित राष्ट्रपतिको सपथमा सहभागी नहुने ट्रम्पमात्र पहिलो राष्ट्रपति भने होइनन् । जोन आडम्स, जोन क्वीन्सी आडम्स र एन्ड्रयु जोन्सन पनि नव निर्वाचित राष्ट्रपतिको सपथमा सहभागी भएका थिएनन् । ट्रम्पलाई जस्तै जोन्सनलाई पनि महाभियोग लगाइएको थियो । गत बुधबार अमेरिकाको प्रतिनिधिसभाले ट्रम्पलाई महाभियोग लगाइसकेको छ । जसमा १० जना रिपब्लिकन सांसदले समेत साथ दिएका थिए ।
ट्रम्प अमेरिकी इतिहासमा दुईपटकसम्म महाभियोग लगाइएका पहिलो राष्ट्रपति हुन् । उनलाई शक्तिको दुरुपयोग गरेको अभियोगमा सन् २०१९ को डिसेम्बरमा प्रतिनिधिसभाबाट महाभियोग लगाइएको थियो । तर उनले सिनेटबाट भने उन्मुक्ति पाएका थिए ।
ट्रम्प सहभागी नभएपनि उपराष्ट्रपति माइक पेन्स र उनकी पत्नी करेन पेन्स भने बाइडेनको सपथमा सहभागी हुने अपेक्षा गरिएको छ । बराक ओबामा, बिल क्लिन्टन र जर्ज डब्ल्यु बुस पनि सपत्नी सपथग्रहण समारोहमा सहभागी हुने भएका छन् । स्वास्थ्य अवस्थाका कारण ९६ बर्षका पूर्व राष्ट्रपति जिम्मी कार्टर भने सहभागी हुने छैनन् ।
जनवरी ६ मा भएको दंगाफसादपछि बाइडेनको सपथग्रहण समारोहलाई ध्यानमा राखेर सुरक्षा व्यवस्था अत्यन्तै कडा बनाइएको छ । वासिंटन डिसीमा संकटकाल लगाइएको छ भने २० हजार सेना परिचालन गरिदैछ । जनवरी २० मा वासिंटन डिसीमा खट्ने सेनाको संख्या इराक, अफगानिस्तान र सिरियामा रहेका कुल अमेरिकी सेनाको भन्दा बढी हुनेछ ।
