बाइडेन कार्यकालको सुरुको १ सय दिनमा एक सय मिलियन भ्याक्सिन डोज वितरण सम्भव
प्रकाशित मिति : माघ २, २०७७ शुक्रबार
❒ बाइडेनको कार्यकालको सुरुको १ सय दिनमा एक सय मिलियन कोरोनाबिरुद्धको भ्याक्सिनका डोज वितरण सम्भव
❒ बाइडेनले आज भ्याक्सिन वितरणको योजनाबारे सम्बोधन गर्ने, अर्कोसाता राष्ट्रपतिको कार्यभार सम्हाल्दै
❒ अमेरिकामा अहिलेसम्म झण्डै ३१ मिलियन कोरोनाबिरुद्धको भ्याक्सिनको डोज वितरण, ११ मिलियन भ्याक्सिनका डोजहरु प्रदान
❒ २० मिलियन जनसंख्या भएको न्युयोर्कमा झण्डै २ मिलियन डोज प्राप्त, झण्डै ७ मिलियन जनसंख्या भ्याक्सिन लगाउनका लागि योग्य, कुल जनसंख्याको झण्डै साढे ३ प्रतिशतलाई भ्याक्सिन
❒ खसोखासमा थप समाचारहरुका लागि यहाँ क्लीक गर्नुहोला ।
नवनिर्वाचित अमेरिकी राष्ट्रपति जो बाइडेनको कार्यकालको सुरुको १ सय दिनमा एक सय मिलियन कोरोनाबिरुद्धको भ्याक्सिनका डोज वितरण सम्भव भएको अमेरिका बरिष्ठ सरुवा रोग विशेषज्ञ डाक्टर एन्थोनी फाउचीले बताएका छन् । फाउचीले बाइडेनको मेडिकल सल्लाहकारका रुपमा काम गर्दैछन् ।
फाउचीले भनेका छन् -‘हामीले यसबारे बाइडेनको टीमसँग सल्लाह गरेका छौं । र यो सम्भव हुने हामी ठान्छौं । अहिलेका लागि हामी दैनिक ५ लाखबाट साढे सात लाख भ्याक्सिन वितरण गर्न सुरु गरिसकेका छौं । यो गर्न सकिने काम हो । यदि हामीले गर्न सकेमा अमेरिकाको अधिकांश जनसंख्याले सयदिनभित्र भ्याक्सिन प्राप्त गर्नेछ ।’
यदि ७० देखि ८५ प्रतिशतले भ्याक्सिन प्राप्त गरेको खण्डमा हर्ड इम्युनिटीको छाता प्राप्त हुनसक्ने फाउचीले बताए । अमेरिकामा एकातिर भ्याक्सिन वितरण तीब्र गतिमा भइरहेको छ भने अर्कोतर्फ संक्रमितहरुको संख्या पनि निकै डरलाग्दो रहेको छ ।
नवनिर्वाचित अमेरिकी राष्ट्रपति बाइडेनले आज भ्याक्सिन वितरणको योजनाबारे सम्बोधन गर्ने कार्यक्रम समेत रहेको छ । अर्कोसाता राष्ट्रपतिको कार्यभार सम्हाल्दै गरेका बाइडेनले आज दिउसो पौने ४ बजे डेलाबरबाट सम्बोधन गर्नेछन् ।
अमेरिकामा अहिलेसम्म झण्डै ३१ मिलियन कोरोनाबिरुद्धको भ्याक्सिनको डोज वितरण भइसकेको छ । ११ मिलियन भ्याक्सिनका डोजहरु प्रदान गरिसकिएको छ । जसमध्ये झण्डै १० मिलियन पहिलो डोज प्राप्त गर्नेहरु रहेका छन् । झण्डै डेढ मिलियनले दोश्रो डोज पनि प्राप्त गरिसकेका छन् ।
२० मिलियन जनसंख्या भएको न्युयोर्कले झण्डै २ मिलियन डोज प्राप्त गरिसकेको छ । न्युयोर्कमा झण्डै ७ मिलियन जनसंख्या भ्याक्सिन लगाउनका लागि योग्य भइसकेको छ । न्युयोर्कमा कुल जनसंख्याको झण्डै साढे ३ प्रतिशतले भ्याक्सिन लगाइसकेका छन् ।