‘मेटल डिटेक्टर’ छलेर संसद छिर्ने अमेरिकी सांसदलाई ५ हजार डलर जरिवाना, तलबबाट कटाइने
प्रकाशित मिति : पुस २९, २०७७ बुधबार
❒ ‘मेटल डिटेक्टर’ छलेर संसद छिर्ने सांसदलाई पहिलोपटक ५ हजार डलर र दोश्रो पटक १० हजार डलर जरिवाना गरिने, रकम उनीहरुको तलबबाट कटाइने
❒ मास्क नलगाउने सांसदलाई ५ सय डलर र दोश्रोपटक नियम उल्लंघन गर्नेलाई २५ सय डलर जरिवाना
❒ कोलोराडोकी रिपब्लिकन सांसदबाट ‘मेटल डिटेक्टर’ बाट जान अटेरी, सुरक्षाकर्मीलाई झोला चेक नगर्न चेतावनी, अर्कासान्सका रिपब्लिकन सांसदबाट सुरक्षाकर्मीहरुलाई आफूलाई नछुन चेतावनी
❒ खसोखासमा थप समाचारहरुका लागि यहाँ क्लीक गर्नुहोला ।
अमेरिकी संसदको प्रतिनिधिसभाकी स्पीकर न्यान्सी पेलोसीले ‘मेटल डिटेक्टर’ छलेर संसद छिर्ने सांसदलाई ५ हजार डलर जरिवाना गरिने नियमको घोषणा गरेकी छिन् । यो नियम आगामी सातादेखि कार्यान्वयनमा आउने भएको छ ।
संसदभवनमा अब सांसदहरुले हाउसको च्याम्बरमा छिर्दा नयाँ ‘मेटल डिटेक्टर’ हुँदै छिर्नुपर्नेछ । छलेर छिर्ने सांसदलाई पहिलोपटक ५ हजार डलर र दोश्रो पटक १० हजार डलर जरिवाना गरिनेछ । यो रकम उनीहरुको तलबबाट कटाइनेछ ।
जनवरी २१ मा प्रतिनिधिसभा सुचारु भएपछि नयाँ नियम स्वीकृत गरिने भएको छ । हाउस च्याम्बर र जनताको प्रतिनिधिसभाको सुरक्षाका लागि यो कदम आवश्यक भएको पेलोसीले बताएकी छिन् ।
मंगलबार र बुधबार कैयन रिपब्लिकन सांसदले ‘मेटल डिटेक्टर’लाई छलेर संसद छिरेपछि यो मापदण्ड ल्याउने घोषणा गरिएको छ । सुरक्षाकर्मीहरुले ‘मेटल डिटेक्टर’बाट जान भनेपनि सांसदहरुले अटेरी गरेका थिए ।
सामान्यतया सांसदहरुले आफ्नो पिन देखाएपछि उनीहरुलाई संसद भवनमा जानका लागि अनुमति दिइदै आएको थियो । तर जनवरी ६ को दंगा फसादपछि मंगलबारदेखि ‘मेटल डिटेक्टर’ राखिएको छ ।
संसद भवनमा बन्दुक लग्ने कोलोराडोकी रिपब्लिकन सांसदले मंगलबार राती ‘मेटल डिटेक्टर’ बाट जान अटेरी गरेकी थिइन् भने सुरक्षाकर्मीलाई झोला चेक गर्न समेत दिइनन् । अर्कासान्सका अर्का रिपब्लिकन सांसदले पनि सुरक्षाकर्मीहरुलाई आफूलाई नछुन चेतावनी दिएका थिए ।
मंगलबार प्रतिनिधिसभामा मास्क अनिवार्य गर्ने नियम स्वीकार गरिसकिएको छ । यो नियम अनुशार पहिलोपटक मास्क नलगाउने सांसदलाई ५ सय डलर र दोश्रोपटक नियम उल्लंघन गर्नेलाई २५ सय डलर जरिवाना गरिनेछ ।