बाइडेनको सपथग्रहणको दिन वासिंटन डिसीमा २० हजार सेना परिचालन गरिने
प्रकाशित मिति : पुस २९, २०७७ बुधबार
❒ नवनिर्वाचित अमेरिकी राष्ट्रपति जो बाइडेनको सपथग्रहणको दिन जनवरी २० मा वासिंटन डिसीमा २० हजार सेना परिचालन गरिने
❒ अहिलेसम्म यो स्तरको सुरक्षाबल वासिंटन डिसीमा आएको आफूले अहिलेसम्म नदेखेको डिसीका प्रहरी प्रमुखको भनाई
❒ जनवरी ११ देखि २४ सम्म संकटकालको घोषणा
❒ खसोखासमा थप समाचारहरुका लागि यहाँ क्लीक गर्नुहोला ।
नवनिर्वाचित अमेरिकी राष्ट्रपति जो बाइडेनको सपथग्रहणको दिन जनवरी २० मा वासिंटन डिसीमा २० हजार सेना परिचालन गरिने भएको छ । शान्ति सुरक्षाको अवस्थालाई मध्यनजर गरेर स्थानीय र संघीय स्तरको सुरक्षा वयवस्था कडा बनाइने भएको हो ।
२० हजार सेना परिचालनको अपेक्षा गरिएपनि अन्तिम संख्या भने सिक्रेट सर्भिसबाट आउन बाँकी रहेको डीसीका प्रहरी प्रमुखले बताएका छन् । संसदको सुरक्षामा खटिने प्रहरीको सहयोगका लागि झण्डै ३० हजार नेशनल गार्डको माग गरिएको थियो ।
अहिलेसम्म यो स्तरको सुरक्षाबल वासिंटन डिसीमा आएको आफूले अहिलेसम्म नदेखेको डिसीका प्रहरी प्रमुखको भनाई छ । वासिंटन डिसीमा सपथग्रहण र त्योभन्दा अगाडिका दिनको सुरक्षा खतरा र प्रदर्शनहरुलाई लिएर चासो निकै बढेको छ ।
बाइडेनको सपथग्रहणमा हिंशा भड्किनसक्ने जोखिमलाई मध्यनजर गरेर वासिंटन डिसीमा संकटकाल घोषणा गरिएको छ भने उक्त संकटकाललाई डोनाल्ड ट्रम्पले स्वीकृति प्रदान गरिसकेका छन् । सपथग्रहणको दिनमा शान्ति सुरक्षाको अवस्थालाई ध्यानमा राखेर ट्रम्पले संकटकालको घोषणा स्वीकृत गरेका हुन् ।
वासिंटन डिसी क्षेत्रमा संकटकालिन अवस्था विद्यमान रहेको र संकटकालिन अवस्थाका कारण वासिंटन डिसीमा संघीय सहायता परिचालनको अनुमति दिइएको हो । जनवरी ११ देखि २४ सम्म संकटकालको घोषणा गरिएको हो ।
वासिंटन डिसीकी मेयरले राष्ट्रपति ट्रम्पलाई पत्र लेखेर संकटकालको घोषणा स्वीकृत गर्न आग्रह गरेकी थिइन् । संकटकालको घोषणापछि बाइडेनको सपथग्रहण समारोहका लागि सुरक्षालाई ध्यानमा राखेर संघीय सरकारबाट अतिरिक्त सहायता प्राप्त हुनेछ ।
जनवरी २४ सम्मका लागि वासिंटन डिसीमा सेनाको सहायता पनि मागिएको छ । नवनिर्वाचित अमेरिकी राष्ट्रपति बाइडेनको सपथलाई निशाना बनाएर अमेरिकामा ५० राज्यमा सशस्त्र प्रदर्शनको तयारी भइरहेको एफबीआईएले जनाएको छ ।
वासिंटन डिसीमा रहेको क्यापिटल हिल र ५० वटै राज्यमा रहेका संसद भवनमा १६ जनवरीदेखि २० जनवरीसम्म प्रदर्शनको तयारी भइरहेको एफबीआईएको बुलेटिनमा उल्लेख गरिएको हो ।
डोनाल्ड ट्रम्पलाई जनवरी २० भन्दा अगाडि नै २५ औं ससोधन लगाएर हटाइएको खण्डमा सशस्त्र प्रदर्शन अझ बढाउने तयारी भएको एफबीआईएको बुलेटिनमा उल्लेख छ । प्रतिनिधिसभाले ट्रम्पलाई २५ औं संसोधन लगाएर हटाउन उपराष्ट्रपति माइक पेन्सलाई आग्रह गर्ने प्रस्ताव पारित गरिसकेको छ ।
सपथग्रहण अगाडि नवनिर्वाचित राष्ट्रपति जो बाइडेनलाई क्षति गर्ने खालका धम्की र जोखिमहरुको पनि अवलोकन गरिरहेको एफबीआईएले जनाएको छ । साथै केही रिपोर्टहरु नवनिर्वाचित उपराष्ट्रपति कमला ह्यारिस र हाउस स्पीकर न्यान्सी पेलोसीलाई नोक्सान गर्ने खालका समेत रहेको जनाइएको छ ।
प्रदर्शनकारीहरुले अन्य सरकारी भवनमा क्षति पुर्याउने योजना समेत बनाएको जनाइएको छ । खासगरी जनवरी २० लाई लक्ष्यीत गरेर सबै राज्यहरुमा सुरक्षा व्यवस्था कडा बनाइदै गएपनि सबै राज्यमा प्रदर्शन हुने अपेक्षा भने गरिएको छैन ।