ट्रम्पबिरुद्धको महाअभियोग प्रस्तावमा प्रतिनिधिसभामा छलफल सुरु
प्रकाशित मिति : पुस २९, २०७७ बुधबार
❒ अमेरिकी राष्ट्रपति डोनाल्ड ट्रम्पबिरुद्धको महाअभियोग प्रस्तावमा संसदको तल्लो सदन प्रतिनिधिसभामा छलफल सुरु
❒ ‘ट्रम्प पक्षधर आक्रमणकारीहरु आतंकारीहरु हुन् र उनीहरुलाई ट्रम्पबाट कट्टर बनाइयो’ – डेमोक्रेटिक सांसद
❒ विद्रोहका लागि उत्तेजना फैलाएको अभियोगसहित ट्रम्पबिरुद्धको महाअभियोग प्रस्तावमा आजै मतदान हुने अपेक्षा
❒ खसोखासमा थप समाचारहरुका लागि यहाँ क्लीक गर्नुहोला ।
अमेरिकी राष्ट्रपति डोनाल्ड ट्रम्पबिरुद्धको महाअभियोग प्रस्तावमा संसदको तल्लो सदन प्रतिनिधिसभामा छलफल सुरु भएको छ । आज विहान ९ बजेदेखि सुरु भएको प्रतिनिधिसभाको बैठक झण्डै १५ मिनेटका लागि स्थगित भएको थियो । त्यसपछि ९ बजेर १६ मिनेटमा सुरु भएको बैठकमा महाअभियोग प्रस्तावबारेको छलफल भइरहेको छ ।
डेमोक्रेटिक सांसदहरुले ट्रम्प पक्षधर आक्रमणकारीहरु आतंकारीहरु भएको र उनीहरुलाई ट्रम्पबाट कट्टर बनाइएको बताएका छन् । अमेरिकामा मेक अमेरिका ग्रेट अगेन नामको गृहयुद्ध सुरु गर्न खोजिएको उनीहरुले आरोप लगाएका छन् ।
क्यालिफोर्नियाकी सांसद जुडी चुले ट्रम्प जिम्मेबारीमा रहनु अत्यन्तै खतरनाक भएकाले महाअभियोग लगाइनुपर्ने बताएकी छिन् । उनले भनिन् – ‘हामी आतंककारीको हमलामा परेका थियौं । र यसपटक आतंककारीहरुलाई ट्रम्पले कट्टर बनाएका थिए , जसले आफ्ना समर्थकहरुलाई चुनावमा धाँधली भएको भन्दै जानाजान झूठो बोले ।’
महाअभियोग प्रस्तावमा आजै मतदान हुने अपेक्षा गरिएएको छ । विद्रोहका लागि उत्तेजना फैलाएको अभियोगसहित ट्रम्पबिरुद्ध महाअभियोग प्रस्ताव ल्याइएको हो ।
महाअभियोग प्रस्तावको पूर्ण पाठ
ट्रम्पबिरुद्ध उनको ४ बर्षे कार्यकालमा दोश्रोपटक महाअभियोग प्रस्ताव ल्याइएको हो । बुधबार यसको प्रकृया अगाडि बढाउने क्रममा क्यापिटल हिलमा सुरक्षा व्यवस्था कडा बनाइएको छ ।
