जी न्यूजको आपत्तिजनक रिपोर्ट- ‘सगरमाथामा भारतले दाबी गर्नुपर्छ’


प्रकाशित मिति : पुस २९, २०७७ बुधबार

❒ नेपालको राष्ट्रियतामाथि आघात पुर्याउने गरी जी न्यूजद्धारा आपत्तिजनक रिपोर्ट प्रसारण

❒ जी न्यूज भन्छ- ‘सगरमाथामा भारतको पनि दाबी हुनुपर्छ र शिखरको नाम पनि फेर्नुपर्छ’ 

❒ खसोखासमा थप समाचारहरुका लागि यहाँ क्लीक गर्नुहोला ।

नेपालको राष्ट्रियतामाथि आघात पुर्याउने गरी भारतीय न्यूज च्यानल जी न्यूजले आपत्तिजनक रिपोर्ट प्रसारण गरेको छ । जी न्यूजले विश्वको सर्वोच्च शिखर सगरमाथामा भारतको पनि दाबी हुनुपर्ने बताउँदै त्यसको नाम पनि फेर्नुपर्ने बताएको छ ।

गत सोमबार प्रधानमन्त्री केपी शर्मा ओलीसँग अन्तर्वार्ता लिन नेपाल आएको जी न्यूजको टोलीलाई प्रधानमन्त्री ओलीले बालुवाटारमा स्वागत गरेका थिए । प्रधानमन्त्री ओलीसँग अन्तर्वार्ता लिएपछि उक्त टोली हेलिकप्टरमार्फत सगरमाथा आधार शिविर पुगेको थियो ।

जी न्यूजले मंगलबार राति प्रशारण भएको कार्यक्रममा सगरमाथामा भारतको पनि दाबी हुनुपर्ने र त्यसको नाम पनि फेर्नुपर्ने भन्दै सगरमाथालाई भारतीय नाम दिने अभियान थालेको हो ।

जी न्यूजका प्रधानसम्पादक सुधीर चौधरीले कालापत्थर पुगेर सगरमाथालाई पृष्ठभूमिमा राखेर भारतीय गणितज्ञ राधानाथ सिकदरले माउन्ट एभरेस्टको उचाइ नापेको बताउँदै उक्त शिखरको नाम राधानाथ सिकदरको नामबाटै हुनुपर्ने दाबी गरेका छन् । सुधिरले माउन्ट एभरेस्टमाथि आफ्नो दाबी विश्वभर पेश गर्नुपर्ने बताएका छन् ।

प्रधान सम्पादक चौधरीले भनेका छन्, ‘राधानाथ सिकदर बंगालका प्रख्यात गणितज्ञ थिए । उनले माउन्ट एभरेस्टको उचाइ नापे । माउन्ट एभरेस्टको उचाइ नाप्ने उनी नै पहिलो व्यक्ति थिए । भारतमा त्यसवेला अंग्रेजको शासन थियो, त्यसैले उनीहरूले आफ्नो हिसाबले नाम राखिदिए । एन्ड्रयु वा जो जर्ज एभरेस्टका उत्तराधिकारीको रूपमा सर्भे अफ इन्डियाको प्रमुख थिए । उनले यो शिखरको नाम माउन्ट एभरेस्ट राखिदिए ।

हामी भन्न चाहन्छौँ कि यो शिखरको नाम राधानाथ सिकदरको नामबाट राखिएको हुनुपथ्र्यो । आज हामी भन्न चाहन्छौँ, यो शिखरको नाम राधानाथ सिकदरको नामबाटै हुनुपर्छ । भारतले यसका लागि अभियान चलाउनुपर्छ, भारतका जनताले पनि अभियान चलाउनुपर्छ । हामीले पनि माउन्ट एभरेस्टमाथि आफ्नो दाबी पेस गर्नुपर्छ ।’

भिडियो :-

यसअघि पनि नेपालकैविरुद्धमा जी न्यूजले कार्यक्रम चलाएको थियो । नेपालले लिम्पियाधुरा, लिपुलेक र कालापानीसहितको नक्सा जारी गरेपछि ओली चिनियाँ राजदूत यान्छीको ‘प्रेमजाल’ मा परेको भन्दै ओली र होउ यान्छीबीचको कपोलकल्पित सम्वादसहित आपत्तीजनक रिपोर्ट बजाएको थियो ।

 

© 2024 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com