ट्रम्पलाई २५ औं संसोधन लगाएर हटाउने प्रस्तावमा आज मतदान, महाअभियोगमा मतदान भोलि
प्रकाशित मिति : पुस २८, २०७७ मंगलबार
❒ ट्रम्पलाई अमेरिकी संविधानको २५ औं संसोधन लगाएर ह्वाइटहाउसबाट हटाउन उपराष्ट्रपति माइक पेन्सलाई आव्हान गर्ने प्रस्तावमाथि प्रतिनिधिसभामा मतदान हुने अपेक्षा
❒ ट्रम्पबिरुद्धको महाअभियोग प्रस्तावमा संसदको तल्लो सदन प्रतिनिधिसभामा बुधबार मतदान हुने
❒ ट्रम्पबिरुद्ध उनको ४ बर्षे कार्यकालमा दोश्रोपटक महाअभियोग प्रस्ताव
❒ खसोखासमा थप समाचारहरुका लागि यहाँ क्लीक गर्नुहोला ।
आज डोनाल्ड ट्रम्पलाई अमेरिकी संविधानको २५ औं संसोधन लगाएर ह्वाइटहाउसबाट हटाउन उपराष्ट्रपति माइक पेन्सलाई आव्हान गर्ने प्रस्तावमाथि प्रतिनिधिसभामा मतदान हुने अपेक्षा गरिएको छ । त्यसअगाडि प्रतिनिधिसभाको नियमन समितिले प्रस्तावमाथि सुनुवाई गरेको छ ।
जनवरी ६ मा क्यापिटल हिलमा भएको दंगाफसादका लागि राष्ट्रपति ट्रम्पले उक्साएको भन्दै ट्रम्पलाई जनवरी २० अगाडि नै हटाउन यो प्रस्ताव ल्याइएको हो । २५ औं संसोधनले राष्ट्रपति काम गर्न अक्षम भएको अवस्थामा उनलाई हटाएर उपराष्ट्रपतिले कार्यवाहक राष्ट्रपतिका रुपमा काम गर्न सक्ने व्यवस्था गरेको छ ।
२५ औं संसोधनको प्रयोग गरेर ट्रम्पलाई हटाउन पेन्सलाई आग्रह गर्नेहरुको संख्या बढिरहँदा हिजो प्रतिनिधिसभामा यो प्रस्ताव पेश गरिएको थियो ।
हिजोको बैठकमा यो प्रस्ताव निर्विरोध पारित गराउनका लागि पेश गरिएपनि रिपब्लिकन सांसदको आपत्तिपछि निर्विरोध हुन सकेको थिएन ।
त्यस्तै अमेरिकी राष्ट्रपति डोनाल्ड ट्रम्पबिरुद्धको महाअभियोग प्रस्तावमा संसदको तल्लो सदन प्रतिनिधिसभामा बुधबार मतदान हुने भएको छ । महाअभियोग प्रस्तावबारेको छलफल र मतदानका लागि बुधबार विहान ९ बजे प्रतिनिधिसभाको बैठक बस्ने जनाइएको छ ।
ट्रम्पबिरुद्धको महाअभियोग प्रस्तावको पाठ सार्वजनिक गरिसकिएको छ । विद्रोहका लागि उत्तेजना फैलाएको अभियोगसहितको महाअभियोग प्रस्तावको पूर्ण पाठ सार्वजनिक गरिएको हो ।
महाअभियोग प्रस्तावको पूर्ण पाठ
ट्रम्पबिरुद्ध उनको ४ बर्षे कार्यकालमा दोश्रोपटक महाअभियोग प्रस्ताव ल्याइएको छ । बुधबार यसको प्रकृया अगाडि बढाउने क्रममा क्यापिटल हिलमा सुरक्षा व्यवस्था कडा बनाइने भएको छ ।