वासिंटन डिसीमा संकटकाल घोषणा
प्रकाशित मिति : पुस २७, २०७७ सोमबार
नवनिर्वाचित अमेरिकी राष्ट्रपति जो बाइडेनको सपथग्रहणमा हिंशा भड्किनसक्ने जोखिमलाई मध्यनजर गरेर वासिंटन डिसीमा संकटकाल घोषणालाई डोनाल्ड ट्रम्पले स्वीकृति प्रदान गरेका छन् । सपथग्रहणको दिनमा शान्ति सुरक्षाको अवस्थालाई ध्यानमा राखेर ट्रम्पले संकटकालको घोषणा स्वीकृत गरेका हुन् ।
ह्वाइट हाउसका तर्फबाट आज साँझ जारी गरिएको वक्तब्यमा वासिंटन डिसी क्षेत्रमा संकटकालिन अवस्था विद्यमान रहेको र संकटकालिन अवस्थाका कारण वासिंटन डिसीमा संघीय सहायता परिचालनको अनुमति दिइएको उल्लेख गरिएको छ । जनवरी ११ देखि २४ सम्म संकटकालको घोषणा गरिएको हो ।
वासिंटन डिसीकी मेयरले आइतबार राष्ट्रपति ट्रम्पलाई पत्र लेखेर संकटकालको घोषणा स्वीकृत गर्न आग्रह गरेकी थिइन् । संकटकालको घोषणापछि अब बाइडेनको सपथग्रहण समारोहका लागि सुरक्षालाई ध्यानमा राखेर संघीय सरकारबाट अतिरिक्त सहायता प्राप्त हुनेछ ।
जनवरी २४ सम्मका लागि वासिंटन डिसीमा सेनाको सहायता पनि मागिएको छ । नवनिर्वाचित अमेरिकी राष्ट्रपति बाइडेनको सपथलाई निशाना बनाएर अमेरिकामा ५० राज्यमा सशस्त्र प्रदर्शनको तयारी भइरहेको एफबीआईएले जनाएको ससाचार आए लगत्तै संकटकालको घोषणा स्वीकृत गरिएको हो ।
वासिंटन डिसीमा रहेको क्यापिटल हिल र ५० वटै राज्यमा रहेका संसद भवनमा १६ जनवरीदेखि २० जनवरीसम्म प्रदर्शनको तयारी भइरहेको एफबीआईएको बुलेटिनमा उल्लेख गरिएको हो ।
सपथग्रहण समारोहका लागि सुरक्षा व्यवस्था कडा बनाइरहँदा यो खबर आएको हो । संघीय, राज्य र स्थानीय स्तरका सुरक्षा निकायहरुले जनवरी २० लाई लक्ष्यीत गरेर सुरक्षा व्यवस्था कडा बनाएका छन् । डोनाल्ड ट्रम्पलाई जनवरी २० भन्दा अगाडि नै २५ औं ससोधन लगाएर हटाइएको खण्डमा सशस्त्र प्रदर्शन अझ बढाउने तयारी भएको एफबीआईएको बुलेटिनमा उल्लेख छ ।
जनवरी ८ मा केही समुहहरुबाट ट्रम्पलाई जनवरी २० अगाडि हटाए राज्य, स्थानीय र संघीय स्तरका संसदहरुमा दंगा मच्याउने आव्हान गरिएकोबारे सुचना प्राप्त गरेको एफबीआईएले जनाएको हो । सपथग्रहण अगाडि नवनिर्वाचित राष्ट्रपति जो बाइडेनलाई क्षति गर्ने खालका धम्की र जोखिमहरुको पनि अवलोकन गरिरहेको एफबीआईएले जनाएको छ । साथै केही रिपोर्टहरु नवनिर्वाचित उपराष्ट्रपति कमला ह्यारिस र हाउस स्पीकर न्यान्सी पेलोसीलाई नोक्सान गर्ने खालका समेत रहेको जनाइएको छ ।
प्रदर्शनकारीहरुले अन्य सरकारी भवनमा क्षति पुर्याउने योजना समेत बनाएको जनाइएको छ । खासगरी जनवरी २० लाई लक्ष्यीत गरेर सबै राज्यहरुमा सुरक्षा व्यवस्था कडा बनाइदै गएपनि सबै राज्यमा प्रदर्शन हुने अपेक्षा भने गरिएको छैन ।