सिनेटरमा पराजित जर्जियाका दुबै रिपब्लिकनबाट हार स्वीकार, वार्नक र ओसोफ सिनेटमा
प्रकाशित मिति : पुस २४, २०७७ शुक्रबार
सिनेट सदस्यको चुनावमा पराजित जर्जियाका दुबै रिपब्लिकनले हार स्वीकार गरेका छन् । जर्जियामा चुनावको तीनदिनपछि रिपब्लिकन उम्मेदबार डेभिड पर्डयुले आफ्नो पराजय स्वीकार गरेका छन् । उनी डेमोक्रेटिक उम्मेदबार जोन ओसोफसँग पराजित भएका थिए ।
यसअगाडि नै अर्का डेमोक्रेटिक उम्मेदबार राफल वार्नकसँग पराजित रिपब्लिकन उम्मेदबार केली लोफ्लेरले आफ्नो पराजय स्वीकार गरिसकेकी छिन् । अब जर्जियाको चुनावको परिणाम डोनाल्ड ट्रम्पकै शैलीमा विना कुनै आधार अस्वीकार नहुने भएको छ ।
डेभिड पर्डयुले सिनेटरको चुनावमा निर्वाचित जोन ओसोफलाई बधाई समेत दिएका छन् । नोभेम्बर ३ को चुनावमा पर्डयुले ओसोफको तुलनामा धेरै मत ल्याएका थिए । तर ५० प्रतिशतभन्दा बढी मत ल्याउनुपर्ने प्रावधानका कारण जनवरी ५ मा अर्को चुनाव भएको थियो ।
ओसोफले जनवरी ५ को चुनावमा भने पर्डयुको तुलनामा ४५ हजार बढी भोट ल्याएका छन् । डोनाल्ड ट्रम्पलाई जर्जियामा जो बाइडेनले झण्डै १२ हजार मतलेमात्र पराजित गरेका थिए । त्यसको तुलनामा ओसोफ र पर्डयुबीचको मतको अन्तर तीनगुणाभन्दा पनि बढी रहेको छ ।
राफल वार्नक र जोन ओसोफले जर्जियाको चुनाव प्रमाणिकरण हुने बित्तिकै सपथग्रहण गर्नेछन् । जुन काम नवनिर्वाचित राष्ट्रपति जो बाइडेनले सपथ ग्रहण गर्ने दिनसम्म भइसक्ने अपेक्षा गरिएको छ ।
वार्नकले सन् २०२२ को चुनावमा पुन प्रतिस्पर्धा गर्नुपर्नेछ भने ओसोफ पूरै ६ बर्ष सिनेटमा रहनेछन् । ३३ बर्षका ओसोफ सन् १९८१ पछि अमेरिकी सिनेटरमा चुनाव जित्ने सबैभन्दा कान्छा व्यक्ति हुन् ।
राफल वार्नक जर्जियाबाट अमेरिकाको सिनेटमा प्रतिनिधित्व गर्ने पहिलो अश्वेत अमेरिकन भएका छन् । जर्जियाबाट सन् २००४ यता सिनेटमा दुबै सदस्य रिपब्लिकनहरु रहदै आएका थिए । जर्जियामा राष्ट्रपति चुनावमा सन् १९९६ देखि रिपब्लिकनले जित्दै आएकोमा यसपटक जो बाइडेनले जीतेका थिए ।
वार्नक र ओसोफको सपथग्रहण पछि अमेरिकाको सिनेटमा रहेका एकसय सिटमध्ये ५० सिट रिपब्लिकनका र ५० सिट डेमोक्र्याट्सका हुनेछन् । तर उपराष्ट्रपति कमला ह्यारिसले गर्ने टाइब्रेक मतका आधारमा सिनेटमा डेमोक्र्याट्सको नियन्त्रण कायम हुनेछ ।