‘नयाँ सिनेटरले काम थालेपछि पहिलो काम २ हजार डलरको राहत चेक’
प्रकाशित मिति : पुस २३, २०७७ बिहीबार
जर्जियाबाट दुबै सिटमा डेमोक्र्याट्सले जीतेपछि सिनेटमा आफ्नो नियन्त्रण कायम गर्दैगर्दा डेमोक्रेटिक सिनेटरले अमेरिकी करदाताहरुलाई २ हजार डलरको राहत चेकलाई उच्च प्राथमिकतामा राखेका छन् । जर्जियामा दुबै सिटमा डेमोक्र्याट्सले जीते लगत्तै क्यापिटल हिलमा पत्रकारसँग बोल्दै डेमोक्रेटिक सिनेटर चक शुमरले २ हजार डलरको राहत चेक उच्च प्राथमिकतामा रहेको बताए ।
शुमरले भने – ‘सहायता आउने क्रममा छ । दुईजना नयाँ सिनेटरहरु हामीलाई सहायताका लागि आउँदैछन् । नयाँ सिनेटरले काम सुरु गर्नासाथ मैले गर्न चाहेको काम २ हजार डलरको राहत चेक पठाउने हो ।’
डेमोक्र्याट्सको नियन्त्रण कायम रहेको प्रतिनिधिसभाबाट दुई हजार डलरको राहत चेक सम्बन्धि बिल पारित भएपनि रिपब्लिकनको बहुमत भएको सिनेटबाट यो पारित हुन सकेको थिएन । तर अब दुबै सदनमा डेमोक्र्याट्सको बहुमत कायम हुने र ह्वाइटहाउसमा समेत डेमोक्रेटिक राष्ट्रपति हुने अवस्थामा यो बिल पारित गर्न गाह्रो नहुने भएको छ ।
ट्रम्पले हस्ताक्षर गरेको पछिल्लो राहत प्याकेज अन्तरगत ६ सय डलरको राहत चेक पठाउने काम भइरहेको छ । कैयनले यो राहत चेक प्राप्त गरिसकेका छन् भने कतिपयले पाउने क्रममा रहेका छन् । तर शुमरले २ हजार डलर अतिरिक्त राहत चेक पठाउने वा ६ सय मा नै १४ सय डलर जोडेर पठाउने भन्नेबारे स्पष्ट पारेका छैनन् ।
बुधबार जर्जियाबाट दुईजना नयाँ डेमोक्रेटिक सिनेटरहरु जोन ओसोफ र राफल वार्नकको जीत घोषणा भइसकेको छ । अब सिनेटमा ५० जना डेमोक्रेटिक सिनेटर र ५० जना रिपब्लिकन सिनेटरहरु हुनेछन् । उपराष्ट्रपतिले गर्ने टाइब्रेक मतका आधारमा नियन्त्रण भने डेमोक्र्याट्सको कायम हुनेछ ।
तर फिलिबस्टर बहुमतबाट सिनेटबाट बिल पारित गर्नका लागि ६० भोटको आवश्यता हुन्छ ।