जर्जियामा अर्का डेमोक्रेटिक उम्मेदबार ओसोफको अग्रता कायम, कति मत गणना गर्न बाँकी छ?
प्रकाशित मिति : पुस २२, २०७७ बुधबार
जर्जियाबाट सिनेटमा डेमोक्रेटिक उम्मेदबार राफल वार्नक विजयी भइसकेका छन् भने अर्का उम्मेदबार जोन ओसोफले अग्रता कायम गरेका छन् । यद्यपी यो अग्रता निकै झिनो भएकाले अहिलेसम्म विजेता घोषणा गरिएको छैन । अहिलेसम्म झण्डै ४४ लाख मतगणना भइसकेको छ ।
अब कति मत गणना हुन बाँकी छ ? बुधबार विहान डिकाल्ब काउन्टीका निर्वाचन निर्देशकले त्यहाँ झण्डै १९ हजार मत गणनागर्न बाँकी रहेको बताएका छन् । प्राविधिक कारणले ती मतहरु एकएक गरेर स्क्यान गर्नुपर्ने भएको छ ।
त्यस्तै ह्यानकक काउन्टीमा पनि मतगणना पूरा भएको छ । यो डेमोक्रेटिक बाहुल्य रहेको सानो काउन्टी हो । अन्य केही काउन्टीमा पनि चुनाव दिन हुलाकबाट प्राप्त भएका र प्रोभिजनल केही मतपत्रहरु गणना गर्न बाँकी रहेको जनाइएको छ ।
फुल्टन काउन्टीमा झण्डै ४ हजार मत आज गणना गरिदैछ । जोन ओसोफ र डेभिड पर्डयुबीचको प्रतिस्पर्धा एकदमै कडा भएमा र मार्जिन निकै कम भएमा शुक्रबारसम्म विजेता घोषणा नहुनसक्छ । किनभने सेनाबाट आएका र विदेशबाट आएका मतपत्रहरु प्राप्त गर्ने डेडलाईन शुक्रबारसम्म रहेको छ ।
विदेशमा रहेका अमेरिकनलाई १७ हजार मतपत्र पठाइएकोमा सबै मतपत्र आइसकेका छैनन् । त्यस्तै मतपत्रमा कुनै समस्या आएमा त्यसलाई समाधानका लागि पनि शुक्रबारसम्मको डेडलाइन रहेको छ ।
मतान्तर शुन्य दशमलव ५ प्रतिशतभन्दा कम भएमा पुन मतगणनासमेत हुनसक्ने देखिएको छ । अहिलेसम्मको परिणाम अनुशार ओसोफले शुन्य दशमलव ४ प्रतिशतले लिड गरिरहेका छन् । ओसोफले २२ लाख ८ हजार ७ सय १७ मत ल्याएका छन् भने रिपब्लिकन उम्मेबार डेभिड पर्डयुले २१ लाख ९२ हजार ३ सय ७४ मत ल्याएका छन् ।
जर्जियाबाट सन् २००४ यता सिनेटमा दुबै सदस्य रिपब्लिकनहरु रहदै आएका थिए । जर्जियामा राष्ट्रपति चुनावमा सन् १९९६ देखि रिपब्लिकनले जित्दै आएकोमा यसपटक डेमोक्रेटिक उम्मेदबार जो बाइडेनले जीतेका थिए ।
ओसोफलले पनि जीतेमा दुबै सिटमा डेमोक्रेटिक उम्मेदबार विजयी हुनेछन् । साथै सिनेटमा पनि डेमोक्र्याट्सको बहुमत कायम हुनेछ ।
वार्नकको जितसँगै सिनेटमा ४९ सिट डेमोक्रेटिक पार्टीले र ५० सिट रिपब्लिकन पार्टीले जीतेका छन् । प्रतिनिधिसभामा डेमोक्र्याट्सको नियन्त्रणका कायम छ ।
ओसोफले पनि जितेमा उपराष्ट्रपटिको टाइब्रेक मतका आधारमा सिनेटमा डेमोक्र्याट्सको बहुमत हुनेछ । बाइडेन प्रशासनले संसदबाट आफूले चाहेका बिलहरु आगामी दुईबर्षसम्म पारित गराउन सक्नेछन् भने विभिन्न नियुक्तीहरु समेत सहजै गर्न सक्नेछन् । तर एउटामात्र सिट रिपब्लिकनले जितेमा पनि सिनेटमा रिपब्लिकनकै बहुमत कायम हुनेछ ।
सिनेटमा बहुमत कायम भएमा बाइडेन प्रशासनले आफूले चाहेका बिलहरु संसदबाट सहजै पारित गराउन सक्नेछ भने नियुक्ती लगायतका विषयमा पनि कुनै अवरोध हुनेछैन । ११ मिलियन कागजपत्रविहिन आप्रवासीहरुलाई ग्रिनकार्डहुँदै नागरिकताको बाटोमा लैजाने डेमोक्र्याट्सको एजेण्डा कार्यान्वयन गर्न पनि बाटो खुल्नेछ ।